Табыс азайды: 23 банктің тек сегізінде таза пайда артты
Қазақстан банктерінің 2026 жылғы алғашқы жартыжылдықтағы нәтижелері нарықтағы айырмашылықтың айқын ұлғайғанын көрсетеді. Бірқатар банк табысын еселеп өсірсе, кейбір қаржы ұйымдарының көрсеткіші өткен кезеңнен едәуір төмендеген.
Ең жоғары өсімді Freedom Bank сақтап отыр. Банктің көрсеткіші бүкіл алты айда да 100%-дан жоғары болып, маусымда өсім 147%-ды құрады. ADCB Islamic Bank те оң динамика көрсетті: маусымдағы өсім 62,6%-ға жетті.
2026 жылғы қаңтар–маусым аралығындағы көрсеткіштердің пайыздық өзгерісі.Түс қоюланған сайын өзгеріс көлемі жоғары.
Отбасы банктің нәтижесі ерекше назар аудартады. Қаңтарда көрсеткіш 45,8%-ға төмендегенімен, мамырда өсімге шығып, маусымда 35,5%-ға жеткен. Home Credit Bank пен Bank of China Kazakhstan да жартыжылдық соңында теріс аймақтан шығып, тиісінше 4,5% және 4% өсім көрсетті.
Ал ірі банктер арасында жағдай әртүрлі. Halyk Bank-та төмендеу қаңтардағы 15,3%-дан маусымда 2,2%-ға дейін баяулаған. Бұл көрсеткіштің біртіндеп қалпына келе бастағанын байқатады. Kaspi Bank-та керісінше, маусымда төмендеу 14,5% деңгейінде сақталды. Банк ЦентрКредиттің көрсеткіші де жақсарғанымен, маусым қорытындысында әлі де 22,4%-ға төмен болды.
Ең үлкен құлдырау Alatau City Bank-те тіркелді. Маусымда оның көрсеткіші 95,6%-ға төмендеген. Еуразиялық банкте төмендеу 67,3%, Bereke Bank-те 47,3% болды.
Нұрбанк пен Zaman Bank нәтижелерінде де күрт өзгеріс байқалады. Нұрбанк қаңтарда 141,9% өсім көрсеткенімен, маусымда 13,2% төмендеуге өтті. Zaman Bank қаңтардағы 188,8% өсімнен кейін маусымда 25,5% төмендеген.
Жалпы алғанда, алғашқы жартыжылдық банк секторындағы өсімнің біркелкі болмағанын көрсетті. Нарықтың бір бөлігінде табыс қарқынды өсіп жатса, басқа банктер бұрынғы нәтижесін сақтап қалуға тырысып отыр.
- Соңғы
Күнделікті жаңалықтар
3 тамыз 2026
