Павлодарда пышақ ұстаған ер адам жедел жәрдем қызметкерлеріне шабуыл жасады
Павлодарда бей-жай қарамайтын жолаушылар күн астында жатқан ер адамға жедел жәрдем шақырған. Алайда науқас бригадаға шабуыл жасап, реанимобилді талқандады.
Облыстық жедел медициналық жәрдем станциясының баспасөз қызметі хабарлағандай, оқиға 10 маусым күні Назарбаев көшесіндегі үйлердің бірінің ауласында болған. Сағат 14:57-де жедел жәрдем пультіне көшеде белгісіз ер адамның жатқаны туралы жолаушыдан шақырту түскен.
«Оқиға орнына жету уақыты 9 минутты құрады. Дәрігерлер ер адамға көмек көрсетпек болғанда, ол агрессия танытып, бригадаға пышақпен қорқытып, оларға тап берген. Белгісіз азамат жүргізушіні жұдырықпен ұрып, кейін реанимобиль салонына кіріп, дәрі-дәрмек салынған ампулаларды сындырып, медициналық сөмкені көліктен лақтырып тастап, бүлдірген», – деді ведомство өкілдері.
Медицина қызметкерлері полицияға арыз жазды.
«Жедел жәрдем қызметкерлеріне қатысты зорлық-зомбылық көрсету немесе оны қолдану дерегі бойынша қылмыстық іс қозғалды. Ер адам ұсталып, мамандандырылған мекемеге қамалды», – деп хабарлады Павлодар облысы полиция департаменті.
Айта кетейік сәуір айында Астанада жедел жәрдем фельдшеріне шабуыл жасаған ер адам сотталғанын жазған едік.
- Соңғы
Күнделікті жаңалықтар
10 маусым 2026
