Nestlé мен Danone балалар тағамынан микропластик анықталды
Жұмсақ пластик қаптамада сатылатын танымал балалар пюресінің құрамынан мыңдаған микропластик бөлшектері мен химиялық заттар анықталды. Бұл туралы халықаралық «Greenpeace International» экологиялық ұйымы мәлімдеді.
Gerber (Nestlé) мен Happy Baby Organics (Danone) брендтері зертханалық тексерістен өткен. Микропластик талданған әрбір үлгіден анықталды.
Gerber өнімнің 1 грамында орта есеппен 54 микропластик бөлшегі бар, бұл бір қаптамада 5 000-нан астам бөлшек бар деген сөз.
Happy Baby Organics өнімінің 1 грамында 99 бөлшекке дейін, яғни бір қаптамада 11 000-нан астам бөлшек анықталған.
Бір шай қасыққа шаққанда, бала тамақпен бірге 270-тен 495-ке дейін микроскопиялық пластик сынықтарын жұтып қоюы мүмкін.
Зерттеушілердің болжамы бойынша, микропластик өнімнің өзінен емес, пластик қаптаманың полиэтилен қабатынан тараған.
Зерттеу нәтижелері тағам мен қаптама материалында пластик өндірісіне қатысты химиялық заттардың бар екенін көрсетті. Gerber үлгілерінен гормоналды жүйеге теріс әсер етуі мүмкін зат табылған.
Ұйым балалар тағамын өндірушілерді өнім сапасына қосымша тексеру жүргізуге және пластик қаптамалардан бас тартып, біртіндеп қауіпсіз баламаларға көшуге шақырады.
- Соңғы
Күнделікті жаңалықтар
10 маусым 2026
