Даниил Медведев Almaty Open турнирінің жеңімпазы атанды
Ресейлік теннисші Даниил Медведев Алматыда өткен ATP 250 санатындағы Almaty Open турнирінің жеңімпазы атанды. Финалда ол грузиялық Николоз Басилашвилиді үш сетте жеңді, деп хабарлайды Kursiv Media.
17–25 қазан аралығында Almaty Arena кешенінде өткен турнирдің финалында әлемдік рейтингте бесінші орында тұрған Медведев ATP рейтингіндегі 128-орындағы Басилашвилимен кездесті.
25 қазанда өткен шешуші матч 1 сағат 53 минутқа созылып, ресейлік теннисшінің 6:7 (6:8), 6:1, 6:3 есебіндегі жеңісімен аяқталды.
Алғашқы сетте грузиялық спортшы әлемнің экс бірінші ракеткасына қарсы лайықты ойын көрсетті. Екі теннисші арасындағы тартысты партия тай-брейкке ұласып, Басилашвили 8:6 есебімен басым түсті. Алайда екінші сетте Медведев ойын тізгінін өз қолына алды. Ресейлік теннисші қарсыласының доп беруінде белсенді ойнап, партияны 6:1 есебімен аяқтады.
Үшінші, шешуші сетте де Медведев басымдығын сақтап, қарсыласының бір геймдегі доп беруін өз пайдасына шешті. Нәтижесінде 6:3 есебімен жеңіске жетіп, Алматыдағы турнирдің чемпионы атанды.
Матч барысында Медведев 22 эйс жасап, төрт қос қателік жіберді. Сондай-ақ 10 брейк-пойнттың төртеуін пайдаланды. Ал Басилашвили үш эйс жасап, үш қос қателікке жол берді. Белсенді ұтып алған ұпайлар саны бойынша да ресейлік теннисші басым болды – 26:17.
Айта кетейік, Николоз Басилашвили Almaty Open турниріндегі жолын іріктеу кезеңінен бастаған. Ол бірнеше қарсыласын жеңіп, финалға дейін жетті. Жартылай финалда грузиялық теннисші грекиялық Стефанос Циципастан басым түсті.
Ал Медведев жартылай финалда Қазақстанның бірінші ракеткасы Александр Бубликпен кездесті. Алайда қазақстандық теннисші оң тізесінен алған жарақатына байланысты матчты мерзімінен бұрын тоқтатуға мәжбүр болды. Осылайша, Медведев финалға жолдама алды.
Алматыдағы жеңіс Даниил Медведев үшін 2026 жылғы маусымдағы төртінші титул болды. Ол ATP рейтингіндегі қоржынына 250 ұпай қосты. Осылайша, Алматыда тоғыз күнге созылған ATP 250 турнирі өз мәресіне жетті.
- Соңғы
- Қазан, 25
-
-
-
-
-
-
-
-
-
-
- Қазан, 24
-
-
-
- Қазан, 23
-
-
-
-
-
Күнделікті жаңалықтар
26 қазан 2026
