Қазақстан 8 айда 407 мың компьютер импорттаған

23.10.2026, 13:50 kz.kursiv.media

2026 жылдың қаңтар–тамызында Қазақстанға 28 елден 406,9 мың дана компьютер әкелінген. Kursiv Media ноутбук және компьютер туарларының импорты қай елден келетінен зерттеп көрді. Импортталған техниканың жалпы салмағы 661 тоннаны құрады. Негізгі жеткізуші – Қытай: елге келген әр бес компьютердің шамамен төртеуі осы мемлекеттен жеткізілген.

Қытайдан Қазақстанға 334,3 мың компьютер импортталған. Бұл жалпы әкелінген компьютерлер санының шамамен 82,2%-ына тең.

Жеткізілімнің құны $158,7 млн, ал бір компьютердің орташа импорттық бағасы $475 болған. Қытай берілген тізімде әрі дана саны, әрі ақшалай құны бойынша көш бастап тұр.

Екінші ірі жеткізуші – Вьетнам. Бұл елден 25,2 мың компьютер әкелінген. Олардың жалпы құны $10,2 млн, бір данасының орташа бағасы $404 деп көрсетілген.

Вьетнамның жалпы импорттағы дана саны бойынша үлесі шамамен 6,2% болған. Қытай мен Вьетнамнан бірге 359,5 мың компьютер жеткізілген. Яғни осы екі елдің үлесіне импортталған компьютерлердің 88,4%-ы тиесілі.

Сянган арнайы әкімшілік ауданынан, яғни Гонконгтан 6,9 мың компьютер келген. Жеткізілім құны $1,3 млн, бір данасының орташа импорттық бағасы $194 болған. Бұл суретте көрсетілген 10 жеткізуші арасындағы ең төмен орташа баға.

Ал Тайваньнан 801 компьютер әкелінгенімен, олардың жалпы құны $2,5 млн-ға жеткен. Бір компьютердің орташа бағасы $3 105 деп көрсетілген.

Осылайша, жеткізілген компьютер саны аз болғанымен, Тайвань ақшалай құны бойынша Қытай мен Вьетнамнан кейінгі үшінші орынға шыққан.

Ресейден Қазақстанға 3,3 мың компьютер импортталған. Олардың жиынтық құны $1,8 млн, орташа бағасы бір данасына $553 болған.

Таиландтан 1,5 мың компьютер жеткізілген. Жалпы құны –$1,9 млн, бір данасының орташа бағасы – $1 281.

Таиландтан келген компьютер саны Ресейден аз болғанымен, жеткізілімнің ақшалай құны жоғары болған.

Көрсетілген ондықта бір компьютердің ең жоғары орташа импорттық бағасы Оңтүстік Африкадан келген техникада тіркелген — $7 886. Бұл елден 63 компьютер әкелініп, олардың жалпы құны $497 мың болған.

Германиядан 36 компьютер жеткізілген. Жиынтық құны $225 мың, ал бір данасының орташа бағасы $6 242 деп көрсетілген.

АҚШ-тан 140 компьютер импортталған. Олардың жалпы құны $413 мың, орташа бағасы $2 951 болған.

Малайзиядан келген 61 компьютердің құны $56 мыңды құраған. Бір данасының орташа импорттық бағасы — $923.

Суретте сомасы көрсетілген негізгі 10 жеткізушіден әкелінген компьютерлердің жиынтық құны шамамен $177,6 млн болды.

Осы ондықтың ақшалай көлеміндегі Қытайдың үлесі 89,4%-ды құрайды. Ал Қытай, Вьетнам және Тайваньның жиынтық үлесі 96,5%-ға жетеді.

Бұл есеп тек көрсетілген 10 жеткізушіге қатысты. Қазақстанға компьютер жеткізген барлық 28 ел бойынша жалпы импорт құны берілген суреттерде көрсетілмеген.

Инфографикадағы бір данаға шаққандағы сома – орташа импорттық баға. Ол дүкендегі бөлшек сауда бағасын білдірмейді.

Елдер арасындағы баға айырмасының себебін нақтылау үшін компьютерлердің моделі, техникалық сипаттамасы және жеткізілім құрамы туралы қосымша мәлімет қажет. Сондықтан орташа бағаның жоғары болуы өздігінен техниканың сапасы жоғары екенін білдірмейді.