Қайрат Сатыбалдыға тиесілі болған бизнес орталық екінші рет өтпей қалды
Қайрат Сатыбалдыға тиесілі болған Алматыдағы Kaisar Plaza бизнес-орталығы электронды сауда порталында тағы да сатылмады. Нысанның бастапқы бағасы 7 миллиард теңгеге төмендеген еді.
Аталған нысан осымен екінші рет сатуға шығарылды. Ғимараттың құны 61 547 298 223 теңгеден 54 445 686 890 теңгеге дейін арзандады. Кепілдік жарна көлемі 8 166 853 034 теңгені құрайлы.
Сауда-саттық 17 маусымда сағат 10:00-де басталғанымен аукционға тіркелген қатысушылар болмаған.
Жалпы аумағы 63,9 мың шаршы метрді құрайтын бизнес-орталық Алмалы ауданындағы Желтоқсан және Бөгенбай батыр көшелерінің қиылысында орналасқан. Ғимарат 9 қабаттан тұрады, қазіргі уақытта орталықтағы кеңселерді 53 кәсіпкер жалға алып отыр.
Әлеуетті сатып алушыларға құжаттардағы сәйкессіздіктер туралы алдын ала ескертілген еді. Бір құжатта нысанның ауданы 63 920 м² деп көрсетілсе, техникалық паспорттың дубликатында 56 480 м² деп берілген.
Айта кетейік, 2025 жылдың ақпан айында Kaisar Plaza қайтарылған активтерді басқару жөніндегі компанияға берілген еді.
Бұған дейін Алматыда орналасқан «Байсат» көтерме-бөлшек сауда орталығы осымен бесінші мәрте электронды аукционда өтпей қалған.
- Соңғы
Күнделікті жаңалықтар
18 маусым 2026
