Алматы облысында 9,5 млрд теңгеге жеміс-жидек өңдейтін зауыт ашылды
Алматы облысында жеміс-жидек пен көкөніс өңдейтін үлкен зауыт ашылды. Бұл жобаны Түркияның танымал «Göknur Gıda» компаниясы мен отандық «Alpecon Group» серіктестігі бірлесіп қолға алған. Жаңа кәсіпорын жылына 70 мың тонна өнімді өңдей алады
Зауыттың құрылысына 9,5 миллиард теңге жұмсалды. Ол 30 гектар жерді алып жатыр. Бұл қаржының 7,1 млрд теңгесін «Қазақстанның Даму банкі» несиеге берген. Қалғаны борышкердің жеке қаржысы.
Қазір зауыт жеміс-жидектен 13 мың тонна қою шырын (концентрат), пюре мен паста дайындайды. Бұл өнімдердің көбі шетелге, соның ішінде Түркияға сатылады.
Кейінірек зауыт алманың қалдықтарынан пектин мен алма талшығын шығара бастайды. Пектин – тамақ өнеркәсібінде өте таптырмас өнім. Дүниежүзінде оны Қытай, Германия мен АҚШ сияқты санаулы елдер ғана өндіреді. Сапалы өнімдер Оңтүстік Корея мен Жапонияға экспортталады.
Қазірдің өзінде зауытта 100-ден астам адам жұмыс істеп жатыр, алдағы уақытта жұмысшылар саны тағы да көбейеді.
Инвесторлардың жоспары үлкен. Олар 2028 жылға қарай Жетісу облысынан Түркістан облысына дейінгі аралықта арнайы қабылдау пункттерін ашпақшы.
Осылайша, жергілікті шаруалардан өнімді тікелей сатып алып, дайын өнімді шетелге шығаратын үлкен бір жүйе құрылады.
Аталмыш жобаны жүзеге асырған «Göknur Gıda» — Түркиядағы ең ірі 500 кәсіпорынның қатарына кіретін, 1993 жылдан бері жеміс өсірумен және табиғи шырындар шығарумен айналысатын алпауыт холдинг.
Ал оның қазақстандық серіктесі «Alpecon Group» — 2024 жылы құрылған жаңа компания. Оның қожайындары — Самат Балабеков (сонымен қатар компанияның бас директоры) пен «Capital NS» фирмасы. Ал «Capital NS» компаниясы Ерғали Досжанов пен Жанаргүл Жақыповаға тиесілі.
- Соңғы
Күнделікті жаңалықтар
22 маусым 2026
