Президент Тоқаев ресми сапармен Брюссельге барды
Президент Қасым-Жомарт Тоқаев ресми сапармен Бельгия астанасына жетті. Мемлекет басшысының келуіне орай Брюссель әуежайында жоғары деңгейдегі салтанатты қарсы алу рәсімі өтті.
Әуежайда Қазақстан президентінің құрметіне Құрмет қарауылы ротасы сап түзеді. Қасым-Жомарт Тоқаевты Еуропа Одағының Орталық Азия бойынша арнайы өкілі Эдуардс Стипрайс және Бельгия тарапының басқа да ресми тұлғалары қарсы алды.
Сапардың негізгі іс-шаралары ертеңге жоспарланған. Еуропалық кеңестің штаб-пәтерінде жоғары деңгейдегі маңызды кездесулер өтеді.
Мемлекет басшысы Еуропа Одағының басшылығымен екіжақты келіссөздер жүргізеді деп күтілуде. Президент Еуропалық кеңес төрағасы Антониу Коштамен және Еуропалық комиссияның төрайымы Урсула фон дер Ляйенмен кездеседі.
Екіжақты кездесулер барысында Қазақстан мен Еуропа Одағы арасындағы саяси, экономикалық және гуманитарлық байланыстарды тереңдету мәселелері талқыланбақ.
Ресми сапар аясында тараптар арасындағы серіктестікті жаңа деңгейге көтеретін бірқатар маңызды бірлескен құжаттарға қол қойылады деп жоспарланып отыр.
Осыған дейін Тоқаев Еуропалық одақ өкілдерімен 3 сәуірде Самарқанда Еуропалық одақ пен Орталық Азия арасындағы екі күндік саммитте кездескен еді.
- Соңғы
Күнделікті жаңалықтар
22 маусым 2026
