Ауылдарда дәрігер тапшылығы азайды
Соңғы бес жылда елде 1 003 жаңа медициналық нысан пайдалануға беріліп, дәрігер тапшылығы 20,4%-ға қысқарды. Ауылдық жерлерде кадр тапшылығының төмендеуі 28,3%-ды құрады. Бұл туралы Kursiv.Media Үкімет баспасөз қызметіне сілтеме жасап хабарлайды.
Денсаулық сақтау жүйесінде бүгінде 280 мыңнан астам медицина қызметкері еңбек етеді. Оның 84 мыңға жуығы – дәрігерлер. Кадр тапшылығын азайту және мамандарды өңірлерде тұрақтандыру мақсатында әлеуметтік қолдау шаралары да кеңейтіліп жатыр.
2025 жылы 1 760 дәрігер әлеуметтік қолдауға ие болды. Тұрғын үймен қамтамасыз етілген дәрігерлер саны 3,3 есе өсіп, 727 адамға жетті. Сонымен қатар ауылдық жерлерде тапшы мамандықтар бойынша жұмыс істейтін 529 маманға 8,5 млн теңгеден біржолғы төлем берілді.
Медициналық инфрақұрылымды жаңғырту аясында 10 аурухана, 14 емхана, 967 дәрігерлік амбулатория мен медициналық пункт, 3 ғылыми медициналық орталық және өзге де 9 ұйым ашылды. Жаңа нысандардың 655-і «Ауылдық денсаулық сақтауды жаңғырту» ұлттық жобасы бойынша пайдалануға берілген.
Мамандар даярлау жүйесі де жетілдіріліп жатыр. Қазір медициналық жоғары оқу орындары мен ғылыми ұйымдарда 72 мыңнан астам адам білім алса, медициналық колледждерде 110 мыңға жуық студент оқиды. Қазақстанда медициналық білім беру бойынша 760 бағдарлама тіркелген.
Сонымен қатар білім беру бағдарламаларына жасанды интеллектіні қолдануға арналған пәндер енгізіліп, медицинадағы цифрлық технологияларды дамыту жұмыстары жүргізілуде. Әл-Фараби атындағы Қазақ ұлттық университетінде медицинадағы жасанды интеллект бағыты бойынша орталық ашылған.
- Соңғы
Күнделікті жаңалықтар
27 қазан 2026
