Франциядағы оқушылардың наразылық акциясына шенеуніктер де қосылды
Франциядағы оқушылардың көтерілісі екінші апта қатарынан жалғасып жатыр. Енді шерушілерге Францияның Сен-Дени қаласының мэрі Балли Багаёко да қосылды деп жазады Kursiv Media
Мемлекеттік шенеуніктің көтерілістің қақ ортасында тұрған видеосы әлеуметтік желіде кеңінен тарады. Ол Парижде өткен шеруде полицияға қарсы тұрып, жас наразылық білдірушілерді қалқалап, «тоқтаңдар» деп айқайлаған.
Ол Reuters агенттігіне берген сұхбатында полицияның студенттерге қарсы әрекет етуге шешім қабылдағанын айтты. Полиция шеруге қатысқан топқа, оның ішінде әкімнің өзіне де көзден жас ағызатын газ қолданған көрінеді. Бірақ шеруге қатысқан жастар полиция қызметкерлеріне қарсы шабуылдаған жоқ еді дейді мэр.
«Олар студенттерге қарай ұмтылып, іс жүзінде оларды қуа бастауға шешім қабылдады. Ал жастардың көпшілігі полиция қызметкерлеріне ешқандай агрессия көрсеткен жоқ», – деді Багаёко.
Балли Багаёко – солшыл бағыттағы «Франция – көнбейді» (LFI) партиясының мүшесі. Ол басқаратын Сен-Дени қаласы Париждің солтүстік шетінде орналасқан.
Франциядағы оқушылардың наразылық акциясы қыркүйек соңында басталған. Бастапқыда жасөспірімдер мұғалімдер жетіспейтінін, сыныптар нашар жабдықталғанын және мектеп ғимараттарының гигиеналық жағдайы нашарлағанын айтып, шеруге шыққан. Кейінірек радикалды солшыл саяси күштердің қолдауымен көтеріліске ұласты. Тәртіпсіздіктер басталып, жиырмадан астам мектеп өртелді. Полиция 5 000-нан астам адамды ұстады, олардың басым бөлігі – кәмелетке толмағандар.
6 қазанда Франция президенті Эмманюэль Макрон елдегі оқушылар наразылығының күшеюіне байланысты министрлермен кездесу өткізетінін хабарлады.
- Соңғы
- Қазан, 08
-
-
-
-
-
-
-
-
-
-
-
-
-
-
-
-
-
-
Күнделікті жаңалықтар
9 қазан 2026
