Шахмат, дебат, ауыл мектебі: педагогтер туралы «Mugalim» деректі фильмі шықты

22.09.2026, 16:34 kz.kursiv.media

Бірі балаларға шахмат үйретеді, бірі ауыл мектебін қоғамның тірегіне айналдырған, енді бірі дебат арқылы оқушылардың сыни ойлау қабілетін дамытып жүр. Қазақстанның әр өңірінде еңбек етіп жүрген үш мұғалімнің осы жұмысы мен бастамалары туралы деректі фильмдер сериясы жарыққа шықты.

Mugalim деректі жобасында Қазақстанның әр өңірінде еңбек етіп жүрген үш мұғалімнің жұмысы көрсетіледі. Олардың әрқайсысы өз бастамасы арқылы оқушыларына, мектебіне немесе жергілікті қоғамға өзгеріс енгізуге тырысып жүр.

Мәселен, Түркістан облысының мұғалімі Ақсәуле Жақыпбекова шахматты бастауыш сыныптағы пәндермен ұштастырып келеді. Ол шахматты балалардың логикасы мен ойлау қабілетін дамытуға пайдалануды көздейді.

Ал Қостанай облысының тумасы Степан Галкин ауыл мектебінің қоғам өміріндегі рөлін арттыруға күш салып жүр. Ол мектепті ауыл тұрғындарының күнделікті өмірімен тығыз байланысты ортаға айналдыруға тырысады.

Сәтбаев қаласының мұғалімі Дана Абельдинова болса, оқушылардың ағылшын тілін жетілдіру үшін дебат клубын құрған. Клубта балалар пікірталас арқылы сыни тұрғыдан ойлауды, өз көзқарасын нақты жеткізуді және оны дәлелдермен қорғауды үйренеді.

Үш мұғалімнің жұмысы әртүрлі болғанымен, ортақ мақсаты – оқушылардың тек білім алып қана қоймай, өздігінен ойлауына және жаңа мүмкіндіктерді пайдалануына жағдай жасау.

Дана Абельдинова үшін білім берудегі басты міндеттердің бірі – балалардың жан-жақты ойлау қабілетін дамыту.

«Бүгінде балалардың терең әрі жан-жақты ойлау қабілетін дамыту мен үшін өте маңызды болып көрінеді. Ой-өрісі кең, ойлау деңгейі жоғары, тығырықтан шығу жолын таба білетін және өз позициясын дәлелдей алатын ұрпақ тәрбиелеуіміз керек. Өйткені ертең дәл осы балалар еліміздің болашағын құрайды», – деді ол.

Мұғалімнің айтуынша, білім беру үдерісін тек педагогтің оқушыға білім беруімен шектеуге болмайды. Мұғалімнің өзі де оқушыларынан және басқа адамдардан үйреніп, үнемі дамып отыруы қажет.

«Біз білім беру процесінде тек мұғалім оқушыға білім береді деген түсінікпен шектелмеуіміз керек. Мұғалімнің де өз оқушыларынан және басқа адамдардан үйренері бар. Сондықтан біз өзіміз де үнемі дамып отыруымыз қажет», – деді Дана Абельдинова.

Үш фильмнен тұратын Mugalim сериясы бүгін, 22 қыркүйекте таныстырылып, YouTube платформасында жарияланды. Жобаны қазақстандық EdTech экожүйесі Bilim Group бастамасымен жүзеге асырған.

Фильмдердің таныстырылымы аясында «Өзгеріс мұғалімнен басталады: бастамашыл педагогтерді қалай қолдау керек» тақырыбында пікірталас өтті.

Онда мұғалімдердің жеке бастамалары білім беру саласындағы тұрақты өзгерістерге қалай әсер ететіні, сондай-ақ мұндай жобаларды дамыту үшін педагогтерге қандай қолдау қажет екені талқыланды.

Пікірталасқа жоба кейіпкері Дана Абельдинова, білім саласының сарапшысы Құралай Байтажикова және педагог-тренер Ескендір Бестай қатысты. Талқылауды Астанадағы ЕҚЫҰ кеңсесінің аккредиттелген медиа және PR сарапшысы Салтанат Әскербекқызы жүргізді.

Шара барысында мұғалімдердің кәсібіне арналған «Bilim бейнесі» ұлттық фотожобасы да таныстырылды. Жоба 1 қазанда іске қосылады.

Оның аясында Қазақстанның әр өңіріндегі педагогтер өз мамандығы, кәсіби құндылықтары және мұғалім болудың өздері үшін мәні туралы фотосуреттер мен қысқа мәтіндер арқылы баяндайды.

Жобаның ерекшелігі – оның мазмұнын мұғалімдердің өздері қалыптастырады. Яғни педагогтер өз кәсібі туралы сырт көздің бағасы арқылы емес, өздерінің әңгімесі мен көзқарасы арқылы таныстырылады.

Ұйымдастырушылардың айтуынша, жоба Қазақстандағы мұғалімдердің кәсіби тәжірибесі мен ұстанымдарын көрсететін цифрлық галерея қалыптастыруды көздейді.