Арзан пәтер: павлодарлық 21 жастағы қыз 9 млн теңгеге алаяқтық жасаған
Павлодарда 21 жастағы қыз алаяқтық жасағаны үшін үш жылға бас бостандығынан айырылды. Ол тұрғындарға қараусыз қалған пәтерлерді арзан бағаға алып беруге уәде еткен, деп хабарлайды Kursiv.Media.
Тергеу мәліметінше, павлодарлық қыз туыстары арасында өзінің әкімдікте жұмыс істейтінін және арзан бағамен пәтер алуға көмектесе алатынын айтқан. Оның сөзінше, баспаналар қараусыз қалған және оларды бастапқы жарна төлеп, қалған сомасын бөліп төлеу арқылы сатып алуға болған.
Жәбірленушілер ұсынысқа келісіп, қызға ақша аударған. Олардың келтірген шығыны 200 мыңнан 2 миллион теңгеге дейін жеткен. Алайда уәде етілген пәтерлерді олар ала алмаған. Кейбір жәбірленушілер үшін қыз пәтер жалдап, оны сатуға уәде еткен баспана ретінде көрсеткен.
Мемлекеттік айыптаушының мәліметінше, жәбірленушілерге келтірілген жалпы шығын шамамен 9 миллион теңгені құраған. Қылмыстық іс алаяқтық фактісі бойынша қаралды. Сот іс материалдарын зерттеп, сотталушының кінәсі дәлелденген деген қорытындыға келген.
Павлодар қаласының қылмыстық істер жөніндегі мамандандырылған ауданаралық сотының судьясы Ануарбек Оспанов бастапқыда сотталушыға төрт жыл бас бостандығынан айыру жазасы тағайындалғанын жариялады.
Сот жаңа Конституцияның қабылдануына байланысты жарияланған рақымшылық туралы заңды қолданып, жазаны үш жылға дейін қысқартты.
Сонымен қатар, 21 жастағы қызға жәбірленушілерге келтірілген материалдық шығынның шамамен 6 миллион теңгесін өтеу міндеттелді.
Сот үкімі заңды күшіне енген жоқ.
- Соңғы
Күнделікті жаңалықтар
21 қыркүйек 2026
