Хуситтердің шабуылы Парсы шығанағы елдерінің қор нарықтарын құлдыратты
Йемендегі хуситтердің Сауд Арабиясына жасаған шабуылдарынан кейін Парсы шығанағы елдерінің қор нарықтары төмендеді, деп хабарлайды Кursiv.Media.
Сауд Арабиясының негізгі TASI индексі сауда-саттықтың алғашқы кезеңінде 0,5%-ға төмендеді. Мұнай өндіруші Saudi Aramco компаниясының акциялары 0,6%-ға арзандады. Теріс әсер аймақтағы басқа нарықтарға да тарады. Катардың қор индексі 0,9%-ға төмендеді.
PressTV хабарлағандай, бұл құлдырау хуситтер Эр-Риядтағы «маңызды нысандарға» зымырандар мен ұшқышсыз ұшақтар арқылы соққы жасағаннан кейін тіркелді.
Қақтығыстың шиеленісуі инвесторлардың мұнай инфрақұрылымы мен аймақтағы негізгі көлік бағыттарына төнетін қауіпке алаңдауын күшейтті. Соңғы айларда хуситтер Сауд Арабиясындағы нысандарға және теңіз қатынасына шабуыл жасап келеді. Ал Баб-эль-Мандеб бұғазы маңындағы жағдай Парсы шығанағы елдерінен мұнай жеткізуге қосымша тәуекел туындатып отыр.
АҚШ президенті Дональд Трамп бұған дейін Сауд Арабиясының хуситтермен күресте әскери қолдау көрсету туралы өтініштерін қабылдамаған. Ал Түркия, керісінше, Сауд Арабиясы және Пәкістанмен жасалған үшжақты қорғаныс келісімі аясында Эр-Риядқа көмек көрсетуге дайын екенін мәлімдеді.
Тағы да оқыңыз: Қор нарығы: Трамп риторикасының жұмсаруы нарықтың өсуіне алып келді
- Соңғы
Күнделікті жаңалықтар
21 қыркүйек 2026
