Қарағанды облысында 300 млн теңге жымқырған директорға қатысты тергеу басталды
Қаржы мониторинг агенттігі «Кең Дала 2» бағдарламасы бойынша «Рашан» ЖШС директорына қатысты тергеу бастады. Ол көктемгі егіс пен егін жинау жұмыстарына бөлінген 300 млн теңге несие қаражатын жымқырды деген күдікке ілінді, деп хабарлайды Kursiv.Media.
Агенттіктің мәліметінше, 2025 жылғы мамырда «Аграрлық несие корпорациясы» АҚ филиалы мен «Рашан» ЖШС арасында айналым қаражатын толықтыру үшін қарыз беру туралы шарт жасалған.
Шарт бойынша міндеттемелердің орындалуына «Даму» кәсіпкерлікті дамыту қоры» АҚ кепілдік берген.
Шарт талаптарына сәйкес «Рашан» ЖШС-нің шотына 300 млн теңге қарыз қаражаты аударылған.
Кейін бұл қаражат егіс науқанына жұмсалатын шығындарды төлеу деген желеумен екі ЖШС-ге бөлініп аударылған. Атап айтқанда, 148 млн теңгеге жуық қаражат тұқым сатып алуға, тағы 152 млн теңге ауыл шаруашылығы техникасын жалға алуға, соның ішінде жанар-жағармай мен еңбекақы шығындарына аударылған.
Алайда іс жүзінде тұқым сатып алынбағаны, техника жалға алынбағаны және көрсетілген жер телімдеріне ауыл шаруашылығы дақылдары егілмегені анықталды.
«Рашан» ЖШС директоры күдікті деп танылды. Соттың санкциясымен оның мүлкіне тыйым салынды. Тергеу жалғасып жатыр», – делінген хабарламада.
Қазақстан Республикасы Қылмыстық-процестік кодексінің 201-бабына сәйкес, тергеу мүддесіне байланысты өзге ақпарат жария етілмейді.
Бұған дейін, Қарағанды облысында «CVK» қаржы пирамидасының ұйымдастырушысы 2 жылға бас бостандығынан шектелген еді.
- Соңғы
Күнделікті жаңалықтар
21 қыркүйек 2026
