Hyundai 2027 жылғы жаңа Bayon-ның дизайнын көрсетті
Hyundai Motor India компаниясы 2027 жылғы Hyundai Bayon моделінің алғашқы дизайн эскиздерін таныстырды. Жаңа модель өлшемі үлкейіп, сыртқы дизайны бұрынғыдан гөрі бұрышты пішінге ие болады. Ал салонда заманауи цифрлық жүйелерге негізделген жаңа архитектура пайда болады деп хабарлайды КурсивАвто.
Carscoops мәліметінше, жаңа Bayon Үндістанда алдағы бірнеше аптада ресми таныстырылады. Одан кейін модель Еуропа мен Таяу Шығысты қоса алғанда, басқа нарықтарға да шығарылады.
Ресми эскиздерге қарағанда, жаңа Bayon айтарлықтай өзгереді. Қазіргі модельдегі хэтчбекке ұқсас пішіннің орнына жаңа кроссовер биіктеу әрі бұрышты шанаққа ие болып, компанияның Art of Steel фирмалық дизайн стилін жалғастырады.
Алдыңғы бөлігінде бөлек орналасқан жарықдиодты фаралар мен ірі қорғаныс элементтері пайда болады. Бүйір тұсында бедерлі қанаттар мен жоғары қарай көтерілетін әйнек сызығы көзге түседі.
Салонда жаңа Hyundai i20 үлгісіне негізделген цифрлық басқару жүйесі болады деп күтіледі. i20 моделінің қымбат нұсқаларында 12,3 дюймдік екі дисплей қолданылады. Ал орталық консольде физикалық батырмалар мен үш дөңгелек басқару тетігі орналасқан.
2027 жылғы Bayon моделінің техникалық сипаттамалары әзірге жарияланған жоқ. Жаңа модель қазіргі платформаның жаңартылған нұсқасына негізделуі мүмкін. Қозғалтқыштар қатарында бензинді, газбен жүретін және жұмсақ гибридті нұсқалар болуы ықтимал.
Carscoops мәліметінше, Еуропа нарығына арналған нұсқасы 1,2 литрлік жұмсақ гибридті қозғалтқышпен жабдықталуы мүмкін. Ал Үндістанға арналған нұсқада 1,5 литрлік бензин қозғалтқышы болуы ықтимал.
Жаңа Bayon-ның Қазақстан нарығына да қатысы бар. Себебі оның алғашқы буыны отандық нарықта сатылған. Курсив Авто 2025 жылы Bayon, i20 және i30 модельдерін Қазақстанға жеткізу тоқтатылғанын жазған. Бұған көлік бағасының өсуі және модельдерді импорттаудың экономикалық тиімділігінің төмендеуі себеп болған.
Тағы да оқыңыз: Аса үнемді жаңа Hyundai Elantra Hybrid таныстырылды.
- Соңғы
Күнделікті жаңалықтар
18 қыркүйек 2026
