Төтенше жағдайлар министрі Костенко шахтасына 700 метр тереңдікке түсті
Төтенше жағдайлар министрі Мұрат Мұханов жұмыс сапарымен Қарағанды облысына барып, Костенко атындағы шахтаға түсті, деп хабарлайды Кursiv.Media.
Министр жер астына шамамен 700 метр тереңдікке түсіп, қауіпсіздік жағдайын тексерді. Шахтаның тау-кен қазбаларын, жабдықтарын, желдету, байланыс және хабарлау жүйелерінің жұмысын қарап шықты. Сондай-ақ, төтенше жағдай кезіндегі қызметкерлердің әрекетімен танысты.
Костенко шахтасы 1942 жылдан бері жұмыс істейді. Қазір онда шамамен 1100 адам еңбек етеді, ал жерасты қазбаларының жалпы ұзындығы 60 шақырымнан асады.
2023 жылдың 28 қазанында «АрселорМиттал Теміртау» АҚ-ның «Костенко» көмір шахтасындағы жарылыс болып, 46 кенші қаза тапты, 28 кенші жарақат алды. Осы апаттан кейін президент Үкіметке «АрселорМиттал Теміртау» компаниясымен инвестициялық ынтымақтастықты тоқтатуды тапсырды. Содан кейін ArcelorMittal және Қазақстан үкіметі меншік құқығын Қазақстан Республикасына беру жөніндегі мәміле туралы алдын ала келісімге қол қойды.
2023 жылдың 8 желтоқсанында ArcelorMittal мемлекет бақылауындағы Qazaqstan Investment Corporation (QIC) тікелей инвестициялар қорына «АрселорМиттал Теміртауды» сату аяқталғанын жариялады.
Осылайша компания Қазақстан үкіметіне Теміртау мен Ақтаудағы металлургиялық кәсіпорындарды 286 млн долларға сатты. Үкімет пен компания ArcelorMittal Temirtau JSC және ArcelorMittal Tubular Products Aktau JSC металлургиялық кәсіпорындарының барлық акциясын QIC сатып алуы туралы келіссөздерді аяқтады. Әрі қарай компания акциялары оның жаңа иесі – Андрей Лаврентьевке берілді. «АрселорМиттал Теміртау» Qarmet болып өзгертіліп, оның бас директоры болып Вадим Басин тағайындалды.
- Соңғы
Күнделікті жаңалықтар
17 қыркүйек 2026
