Атыраудағы мұнай компаниясы 1,4 млрд теңгеден астам айыппұл төледі
Атырау облысындағы «Потенциал Ойл» мұнай-газ компаниясы қоршаған ортаны қорғау саласындағы бұзушылықтар үшін 1,4 миллиард теңгеден астам айыппұлды төледі, деп хабарлайды Kursiv.Media.
Атырау облысының Экология департаменті «Потенциал Ойл» ЖШС қызметін қоршаған ортаны қорғау заңнамасының сақталуына тексеру жүргізді.
Тексеру барысында бірқатар бұзушылықтар анықталды. Компания қоршаған ортаны дұрыс бақылау, ағынды суларды бақылау талаптарын бұзған. Сонымен бірге міндетті экологиялық есептерді тапсырмау, кешіктіріп тапсыру және дұрыс тапсырмау жағдайлары анықталды.
«Ластаушы заттардың шығарындылары мен кейбір жұмыс түрлерінің тиісті экологиялық рұқсатсыз орындалуы, белгіленген шығарындылар лимиттерінен асып кетуі және өндіріс пен тұтыну қалдықтарын басқару талаптарын бұзу жағдайлары анықталды», – делінген хабарламада.
Тексеру нәтижелері бойынша жалпы сомасы 1,4 миллиард теңге әкімшілік айыппұл салынды.
«Потенциал Ойл» ЖШС қолданылған шараларға сотта шағымданды. Бірінші және апелляциялық соттар компанияның шағымдарын қанағаттандырмады.
Қазіргі уақытта мемлекетке жалпы сомасы 1,4 миллиард теңгеден асатын әкімшілік айыппұлдар толық өндірілді.
Бұған дейін Экология министрлігі Қазақстандағы ең ірі мұнай кен орны – Қашаған операторы күкіртті рұқсат етілген көлемнен артық сақтағаны үшін 2,3 трлн теңге айыппұл салған еді.
- Соңғы
Күнделікті жаңалықтар
18 қыркүйек 2026
