Зейнетақы өседі: Еңбек министрлігі төлемдердің қалай құралатынын түсіндірді
Қазақстанда 2026 жылға белгіленген 69 049 теңге ең төменгі зейнетақы мемлекеттік базалық зейнетақы төлемін қамтымайды, деп хабарлайды Кursiv.Media.
Еңбек және халықты әлеуметтік қорғау министрлігі комитетінің хабарлауынша, мемлекеттік зейнетақы бөлек есептеліп, тағайындалады.
1998 жылғы 1 қаңтарға дейін еңбек өтілі бар азаматтарға ынтымақты зейнетақы тағайындалады. Бұдан бөлек, еңбек өтіліне байланысты базалық зейнетақы төленеді.
2026 жылы ең төменгі базалық төлем күнкөріс деңгейінің 70 пайызына, яғни 35 596 теңгеге тең. Оның ең жоғары мөлшері күнкөріс деңгейінің 118 пайызы немесе 60 005 теңге болады.
Зейнетақының ынтымақты және базалық бөліктерінен бөлек, зейнеткерге Бірыңғай жинақтаушы зейнетақы қорындағы (БЖЗҚ) жинақтары есебінен төлем тағайындалуы мүмкін.
Зейнеткерлер алатын жалпы сома әртүрлі болады. Бұл еңбек өтілінің ұзақтығына, жалақы мөлшеріне және БЖЗҚ-дағы жинақ көлеміне байланысты.
2027 жылғы 1 қаңтардан бастап жасына байланысты зейнетақы төлемдерін 8,5 пайызға арттыру жоспарланып отыр. Индексацияның нақты мөлшері республикалық бюджет туралы заңмен бекітіледі. Мысалы, қазіргі төлем 100 мың теңге болса, 8,5 пайыздық өсімнен кейін 108,5 мың теңгеге жетеді.
Зейнетке шығуға шамамен бір жыл қалған азаматтарға еңбек кітапшасын алдын ала тексеру ұсынылады. Құжатта еңбек қызметі туралы толық әрі дұрыс жазбалар, ұйымдардың мөрлері, жұмысқа қабылдау және жұмыстан босату туралы бұйрықтар мен тиісті күндер көрсетілуі керек.
Құжаттарды тұрғылықты жері бойынша Мемлекеттік корпорация бөлімшесінде немесе Еңбек және халықты әлеуметтік қорғау министрлігінің Халықты әлеуметтік қорғау саласындағы реттеу және бақылау комитетінің аумақтық департаментінде тексеруге болады.
Айта кетейік, 7 қыркүйектен бастап қазақстандықтар зейнетақы жинағының 100%-ына дейін жеке инвестициялық компаниялардың басқаруына бере алады. Бұған дейін салымшы жинағының жартысынан аспайтын бөлігін ғана аударуға құқылы еді. Жаңа мүмкіндік міндетті және міндетті кәсіптік зейнетақы жарналары есебінен жиналған қаражатқа қолданылады.
- Соңғы
Күнделікті жаңалықтар
22 қыркүйек 2026
