Енді оң рульді көліктер такси қызметін көрсете алмайды
Енді оң рульді көліктерді такси ретінде қолдануға тыйым салынады. Бұл туралы Үкімет отырысында Көлік министрі Нұрлан Сауранбаев мәлімдеді, деп хабарлайды Kursiv.Media.
Айтуынша, Көлік министрлігі Ішкі істер министрлігімен және Яндекс, inDrive-пен бірігіп, рөлі оң жақтағы 70 мыңға жуық көлікті тасымалдау процесінен шығарды.
Сонымен қатар техникалық байқау орталықтарының жауапкершілігі күшейді. Енді оларға жұмыс бастау үшін арнайы рұқсат алу керек. Айыппұл 30-дан 100 МРП-ге дейін өсті. Техникалық байқауды тек қағаз жүзінде (жалған) жасағандардың жұмысы 3 жылға дейін тоқтатылады.
Министрдің айтуынша, өткен жылдың осы кезеңімен салыстырғанда жол-көлік оқиғалары 10%-ға, қаза болғандар саны 14%-ға, зардап шеккендер 11%-ға төмендеді.
Апаттың негізгі себебі – жүргізушілердің ережені сақтамауы. Жол апатының негізгі факторлары жылдамдықты асыру, арақашықтықты сақтамау, көлікті басқара алмау, қарсы жолға шығу.
«Осы факторларды төмендету үшін жолдағы тәртіпті күшейту және жүргізушілердің дайындығын бақылауда ұстау керек», – деді министр.
Бұған дейін Олжас Бектенов түнде шу шығарып, елдің мазасын алатын көлік пен мотоцикл иелерін қатаң жазалауды талап етті.
- Соңғы
Күнделікті жаңалықтар
22 қыркүйек 2026
