Politico: Қытай Ресейге винтовкалар тасымалдаған

17.03.2023, 09:02 azattyq.org

Қытайлық компаниялар Ресейге шабуыл кезінде пайдаланылатын мыңдаған винтовка тасымалдаған. Бұған қоса, дрондар мен берен сауытқа қажет заттар мен жабдықтар берген. Бұл жөнінде кеден деректерін жариялайтын ImportGenius сайтының ақпаратына сүйенген Politico басылымы жазды.Аталған заттар мен жабдықтар Ресейге 2022 жылдың маусым мен желтоқсан аралығында тасымалданған. Қытайдың қорғаныс саласындағы ірі мердігер компанияларының бірі China North Industries Group Corporation Limited былтыр маусымда Ресей билігімен байланысты "Техкрим" компаниясына винтовкалар жөнелткен.Politico жазуынша, америкалық M16 үлгісі негізінде жасалған CQ-A винтовкалары құжаттарда "азаматтық мақсатта қолданылатын аңшылық қарулары" деп көрсетілген. Қытайда оны – полиция қызметкерлері, Оңтүстік Судан, Парагвай, Филиппинде әскери қызметкерлер қолданады.Бұған қоса, ресейлік компанияларға Түркия арқылы Қытайдан дрондар мен берен сауытқа қажет заттардың 12 партиясы жөнелтілген. Тағы бір қытайлық компания желтоқсан-қараша айларында Ресейге Біріккен Араб Әмірліктері арқылы дрон детальдарын жіберген.Украинадағы соғыста Ресей жағының қытайлық винтовкаларды пайдаланып жатқанына әзірше дәлел жоқ. Алайда бұған дейін Украинада қытайлық Mugin-5 дроны атып түсірілген. Mugin Limited компаниясы аталған дронды шығаратынын растап, оқиғаға өкінген."Біз оның қолданылғанын қаламамаймыз. Оны тоқтатуға күш саламыз" деді компания өкілі CNN арнасына.Батыс елдері Қытайды Ресейге қару-жарақ бермеуге үгіттеп келеді. Бұған дейін бірқатар халықаралық басылым барлау қызметіндегі дереккөзге сүйене отырып, Пекин Мәскеуге қару беру мәселесін қарастырып жатыр деп жазған. Қытай бейтараптық ұстанатынын және қақтығыс болып жатқан аймаққа қару сатпайтынын бірнеше рет мәлімдеген.