Рудныйда мас жүргізуші бағанаға соғылып, 20 тәулікке қамалды
Рудный қаласында мас күйінде көлік жүргізіп, жол апатын жасаған жүргізуші 20 тәулікке әкімшілік қамауға алынды, деп хабарлайды Kursiv.Media.
Қостанай облыстық сотының баспасөз қызметінің хабарлауынша, жүргізуші қаланың коммуналдық мүлкіне зақым келтірген.
Сот материалдарына сәйкес, 2026 жылғы қыркүйекте С. есімді азамат Рудныйдағы Франко көшесімен көлік жүргізіп келе жатып, рөлге ие бола алмай, жергілікті әкімдіктің ТКШ бөліміне тиесілі металл жарықтандыру бағанасына соғылған.
Медициналық куәландыру жүргізушінің жол апаты кезінде орташа дәрежедегі алкогольдік мас күйде болғанын көрсетті. Апат салдарынан материалдық шығын келген.
Сотта ер адам өз кінәсін толық мойындады.
Жүргізушінің әрекеті Әкімшілік құқық бұзушылық туралы кодекстің 608-бабының 3-бөлігі бойынша сараланды. Сот оған 20 тәулік әкімшілік қамау жазасын тағайындап, жеті жылға көлік жүргізу құқығынан айырды.
Сот қаулысы әзірге заңды күшіне енген жоқ.
Бұған дейін Ақтөбе облысында да екі Camry көлігі соқтығысып, алты адам қаза тапқан еді.
- Соңғы
Күнделікті жаңалықтар
24 қыркүйек 2026
