Трамп АҚШ мемлекеттік органдарында «жасанды интеллект» атауын өзгертті
АҚШ президенті Дональд Трамп федералдық атқарушы билік органдарында «жасанды интеллект» (AI) терминінің орнына «суперинтеллект» (SI) атауын қолдануды міндеттейтін жарлыққа қол қойды. Бұл туралы Ақ үйдің баспасөз қызметі хабарлады деп жазады Kursiv Media.
Құжатқа сәйкес, федералдық ведомстволар мен агенттіктер ресми хаттарда, қоғаммен байланыс материалдарында, бағдарламалық құжаттарда және заң мәртебесі жоқ басқа да құжаттарда «суперинтеллект» және «SI» терминдерін қолдануы керек. Ал «жасанды интеллект» және «AI» атауларын бұдан былай пайдаланбауы тиіс.
Президенттің ғылым және технология мәселелері жөніндегі көмекшісіне «суперинтеллект» терминіне ресми анықтама әзірлеу тапсырылды. Сондай-ақ ол бұл ұғымды федералдық органдардың жұмысына енгізу үшін қандай қосымша шаралар қажет екенін анықтайды.
Ақ үйдің мәліметінше, АҚШ жасанды интеллект саласының негізін қалаған елдердің бірі және соңғы 70 жылдан астам уақыт бойы бұл технологияны әзірлеу мен енгізуде әлемдік көшбасшылардың қатарында.
«Суперинтеллект» атауы қазіргі кезде әзірленіп жатқан технологиялардың нақты мүмкіндіктерін көрсетеді. Ол адамның интеллектін жай ғана қайталау немесе автоматтандырудан гөрі, адам шығармашылығының жаңа мүмкіндіктерін ашып, америкалықтарға бұрын қолжетімсіз болған дүниелерге қол жеткізуге мүмкіндік береді», – деп түсіндірді Ақ үй.
Бұған дейін Трамп жасанды интеллектіні дамыту мәселелерімен айналысатын «жасанды интеллект күштері» атты құрылым құруды жоспарлап отырғанын айтқан еді.
- Соңғы
Күнделікті жаңалықтар
30 қыркүйек 2026
