Лос-Анджелес-2028 Олимпиадасына билеттерді алдын ала сатып алу басталды

22.07.2026, 09:58 kz.kursiv.media

АҚШ-тың Лос-Анджелес қаласында өтетін 2028 жылғы Жазғы Олимпиада ойындарына екі жылдан аз уақыт қалды. Дегенмен жанкүйерлер алдағы жарыстарға билеттерді қазірден сатып ала алады.

Ұлттық Олимпиада комитетінің баспасөз қызметінің мәліметінше, қазақстандық спорт жанкүйерлері билеттерді қазір Olympic Hospitality арнайы пакеттері арқылы рәсімдей алады. Ал кейін билеттерді ресми қайта сату платформасы арқылы сатып алуға мүмкіндік болады.

Лос-Анджелес Олимпиадасын ұйымдастырушылардың мәліметінше, билеттердің ресми сатылымы 2027 жылы іске қосылады.

Сол кезде билеттерді сатып алу мерзімі, рәсімі және қолжетімді спорттық жарыстар туралы толық ақпарат Олимпиаданың ресми ресурстарында жарияланады.

Сондай-ақ 2027 жылы AXS, Eventim, Ticketmaster және Sports Illustrated Tickets платформалары негізінде билеттерді ресми қайта сату жүйесі жұмысын бастайды. Оның көмегімен жанкүйерлер пайдаланылмаған билеттерді өзге иелерінен қауіпсіз түрде сатып алып, алаяқтық қаупінен сақтана алады.

Қазір жанкүйерлер Olympic Hospitality ресми бағдарламасы арқылы арнайы пакеттерді сатып ала алады. Брондау тапсырыс рәсімделгеннен кейін бірден жүргізіледі.

Бұл пакеттер тек жарыстарға кіру билетін ғана емес, қосымша қызметтердің кең ауқымын қамтиды.

Жанкүйерлерге:

Olympic Hospitality ұсыныстарымен танысып, брондау жасауға болады.

Осылайша, Олимпиадаға баруды жоспарлаған жанкүйерлер билеттерді ресми сатылым басталғанға дейін арнайы пакеттер арқылы рәсімдей алады.

Ұйымдастырушылардың мәліметінше, Лос-Анджелес Олимпиадасына билеттер барынша қолжетімді бағамен ұсынылады. Ең төменгі баға – 28 АҚШ доллары.

Билеттердің шамамен жартысы 200 доллардан төмен, ал 75 пайыздан астамы 400 доллардан төмен бағамен сатылады.

Ал Олимпиаданың ашылу және жабылу салтанаттарына арналған билеттер ең қымбат санатқа жатады. Олар премиум деңгейдегі орындар ретінде ұсынылады.

Билеттерді сатып алуға бірқатар шектеулер енгізіледі. Бір сатып алушы ең көбі 12 билет рәсімдей алады.

Оның ішінде ашылу және жабылу салтанаттарына арналған билеттер саны жалпы лимит шегінде төрт данадан аспауы тиіс.

Билет сатып алу платформаларында тек 18 жасқа толған адамдар тіркеле алады. Сонымен қатар жасына қарамастан барлық көрермен, оның ішінде кішкентай балалар да жарыстарға кіру үшін жеке билет алуы қажет.

Еске салайық, 2028 жылғы Жазғы Олимпиада ойындары 14-30 шілде аралығында АҚШ-тың Лос-Анджелес қаласында өтеді.

Толық оқыңыз…