Алматы тауларында тоңып қалған екі турист құтқарылды
Алматы облысының Қарасай ауданында тауға шыққан екі жас жігіт суықтан тоңып, өздігінен төмен түсе алмаған. Оларға құтқарушылар көмекке келді, деп хабарлайды Kursiv Media Төтенше жағдайлар министрлігіне сілтеме жасап.
ТЖМ мәліметінше, 2003 және 2004 жылы туған екі турист теңіз деңгейінен 2600 метр биіктіктегі «Терра» алаңқайының маңында болған.
Ауа температурасының төмендеуіне байланысты олар қатты тоңып, таудан өздігінен түсе алмаған.
Оқиға орнына Алматы қаласының Мониторинг және жедел әрекет ету орталығының құтқарушылары барған. Мамандар екі туристі қауіпсіз жерге шығарып, экологиялық бекетке дейін алып келген.
Ведомствоның хабарлауынша, жастарға медициналық көмек қажет болмаған. Құтқарушылардың көмегінен кейін олар үйлеріне өздігінен қайтқан.
Төтенше жағдайлар министрлігі тауға шығатын азаматтарға қауіпсіздік ережелерін сақтауды ескертті. Атап айтқанда, сапар алдында маршрутты жоспарлап, ауа райы болжамын және күннің бату уақытын ескеру қажет.
Сондай-ақ туристерге белгіленген соқпақтан шықпау, өздерінің физикалық мүмкіндіктерін дұрыс бағалау және тауға шығарда ауа райына сай жылы киіну ұсынылады.
- Соңғы
Күнделікті жаңалықтар
13 қараша 2026
