Қазақстан мен Қатар арасында жасырынып жүрген адамдарды ұстап беру тәртібі айқындалды — Сенат

06.03.2025, 09:58 ktk.kz

Бұл құжатқа 2024 жылғы 14 ақпанда Доха қаласында қол қойылды. Келісімнің мақсаты — қылмыс жасап, Қатар Мемлекетінде жасырынып жүрген азаматтарды елімізге қайтару және сол елдің азаматтарын ұстап беру. Сондай-ақ, екіжақты халықаралық құқықтық салада ынтымақтастықты нығайтуға ерекше назар аударылып отыр.

Сенаттың Конституциялық заңнама, сот жүйесі және құқық қорғау органдары комитетінің мәліметіне қарағанда, келісімде іздестірілетін адамдарды қылмыстық жауапкершілікке тарту үшін оларды екі мемлекет арасында экстрадициялау мәселелері регламенттеледі. Адамдарды ұстап беру, ұстап беруді кейінге қалдыру немесе уақытша ұстап беру шарттары мен рәсімдері айқындалған.

Келісім кез келген жағдайда іздеудегі адамды ұстап беруден бас тарту қажет болатын жағдайда міндетті негіздерді белгілейді. Уағдаласушы мемлекеттердің өз азаматтарын ұстап беру көзделмейді. Құжатты ратификациялау екі елдің қылмысқа қарсы іс-қимыл мәселелері бойынша құқықтық ынтымақтастығының тиімділігін арттырады және екіжақты қатынастарды нығайтуға ықпал ететін болады.

Бізді Youtubе-та қараңыз!Бізді Facebook-та, Instagram-да, Telegram-да оқыңыз!