Қазақстанда жеті орындық Changan CS75 Pro шығарыла бастайды
Қытайлық Changan CS75 Pro кроссовері Қазақстанда сериялық өндіріс үшін мақұлдау құжатын алды. Құжатқа сәйкес, жеті орындық модель Алматыдағы Astana Motors Manufacturing Kazakhstan зауытында құрастырылады.
CS75 Pro алдыңғы жетекпен және тұтас темір шанақпен жабдықталған. Көліктің ұзындығы – 4748 мм, ені – 1870 мм, биіктігі – 1720 мм. Дөңгелек базасы – 2786 мм, ал бос салмағы – 1650 кг. Салоны 2+3+2 схемасы бойынша жеті адамға арналған.
Дистрибьютордың баспасөз қызметі Kursiv Auto-ға хабарлағандай, CS75 Pro ірі радиатор торымен, жарықдиодты оптикамен, 19 дюймдік жеңіл қорытпалы дискілермен, төбедегі рейлингтермен және люгі бар панорамалық шатырмен ерекшеленеді. Артқы шамдары жарықдиодты жолақ арқылы бір-бірімен жалғасқан.
Қазақстан нарығына арналған нұсқасы тікелей бүрку жүйесі бар 1,5 литрлік турбомотормен жабдықталады. Қозғалтқыш 181 ат күші мен 280 Нм айналу моментін береді. Ол дымқыл типті қос іліністі 7 сатылы 7DCT роботтандырылған беріліс қорабымен бірге жұмыс істейді.
Көлік 0-ден 100 км/сағ жылдамдыққа 8,4 секундта дейін үдейді. Жүргізуші Eco, Normal және Sport режимдерінің бірін таңдай алады. Автокөлікке АИ-92 және одан жоғары октанды бензин құюға болады.
Салон экобылғарымен қапталған. Жүргізушінің алдында диагоналі 10,25 дюйм болатын цифрлық аспаптар панелі орналасқан. Оған жақын жерде 12,3 дюймдік мультимедиялық экран бар. Сондай-ақ сымды Apple CarPlay және Android Auto жүйелерін қолдау, алты динамигі бар аудиожүйе және климат-бақылауды басқаруға арналған физикалық батырмалар қарастырылған. Жүргізуші орындығы алты бағытта электрлі реттеледі, ал руль дөңгелегі жылытылады.
Жүксалғыш қақпағы қашықтан басқарылатын электрлі жетекпен және қысып қалудан қорғайтын жүйемен жабдықталған. Сонымен қатар электронды тұрақ тежегіші мен Auto Hold функциясы бар. Жеті орындық күйінде жүксалғыштың көлемі 110 литрді құрайды. Үшінші қатар жиналса, бұл көрсеткіш 650 литрге, ал екінші және үшінші қатар толық жиналған кезде 1481 литрге дейін артады.
Қауіпсіздік пен жүргізушіге көмектесетін жүйелер қатарына адаптивті круиз-бақылау, алдыңғы жақтан соқтығысу қаупі туралы ескерту, автоматты түрде шұғыл тежеу, соқыр аймақтарды бақылау, жолақ ауыстыруға көмектесетін жүйе, жан-жақты шолу камералары және шинадағы қысымды бақылау жүйесі кіреді. Сондай-ақ көлікке бейнетіркегіш орнатылған.
Тағы да оқыңыз: Changan сатылған әр көліктен небәрі 4 жарым мың теңге ғана табыс тапқан
- Соңғы
Күнделікті жаңалықтар
8 қыркүйек 2026
