Қазақстан тасжолдарында электрокөліктерді қуаттайтын 27 жаңа станция салынады
Қазақстанда электр көліктерін қуаттандыратын станциялар (ЭҚС) желісін одан әрі кеңейту жұмыстары жүргізіліп жатыр. 2026 жылға арналған жоспарда халықаралық және республикалық маңызы бар автомобиль жолдарының бойында 27 жаңа автожанармай құю станциясын салу көзделген. Ал электр көліктерін қуаттандыру станцияларын сол жоспарланған нысандарда орналастыру қарастырылған.
Көлік министрлігінің мәліметінше, «Батыс Еуропа – Батыс Қытай» автожолының бойында 7 ЭҚС орнату жоспарлда бар.
Бүгінде Қазақстанның 13 өңірінде 62 электр көліктерін қуаттандыру станциясы (ЭҚС) жұмыс істейді.
Станциялардың ең көбі Алматы және Жамбыл облыстарында орналасқан. Бұл жерде 12-ден астам станция бар. Сондай-ақ Ақмола және Қарағанды облыстарының әрқайсысында 8-ден орналасқан станция бар. ЭҚС Атырау, Жетісу, Батыс Қазақстан, Қостанай, Қызылорда, Маңғыстау, Павлодар, Солтүстік Қазақстан және Түркістан облыстарында да жұмыс істейді.
Атап айтқанда, желі елдің әртүрлі көлік бағыттарын қамтиды. Мысалы, «Астана – Алматы» автожолында 13 станция, «Астана – Петропавл» бағытында 7, «Алматы – Өскемен» трассасында 6 станция орналасқан.
Халықаралық көлік дәліздері бойында зарядтау инфрақұрылымын дамытуға ерекше көңіл бөлінуде. Атап айтқанда, «Батыс Еуропа – Батыс Қытай» халықаралық автожолы бойында 19 электр зарядтау станциясы орнатылған.
Орнатылған ЭҚС-тардың қуаты 60-тан 320 кВт-қа дейінгі аралықты құрайды. Бұл электромобиль иелеріне негізгі республикалық және халықаралық бағыттар бойынша сапарларын алдын ала жоспарлауға мүмкіндік береді.
Көлік министрлігі жол саласындағы ұйымдармен және жергілікті атқарушы органдармен бірлесіп, жаңа объектілер салу және қолданыстағыларды Ұлттық стандарттың талаптарына сәйкестендіру мәселелері бойынша жол бойындағы сервис нысандарының жеке инвесторлары мен иелерімен жұмыс жүргізуде.
- Соңғы
Күнделікті жаңалықтар
8 қыркүйек 2026
