Қазақстандағы ең ірі 50 интернет-платформа (инфографика)
Қазақстандағы интернет-сауда нарығында кімнің үлесі басым? Forbes Kazakhstan жариялаған деректер негізінде Kursiv Media елдегі ең ірі 50 интернет-платформаның көрсеткішін бір инфографикаға жинады. Рейтингте Kaspi Магазин өзгелерден айтарлықтай алда – оның 2025 жылғы онлайн-түсімі 4,74 млрд долларға жеткен.
Рейтингтің алғашқы екі орнын Kaspi экожүйесіндегі сервистер иеленді. Kaspi Магазиннің онлайн-түсімі – 4,74 млрд доллар, ал екінші орындағы Kaspi Travel-да бұл көрсеткіш 1,03 млрд доллар болған. Яғни бірінші және екінші орын арасындағы айырмашылық төрт еседен асады.
Үшінші орында Wildberries тұр. Оның Қазақстандағы онлайн-түсімі 601,7 млн долларға бағаланған. Ал алғашқы бестікті Freedom Travel – 292 млн доллар және Halyk Market – 237 млн доллар көрсеткішпен түйіндейді.
Одан кейінгі орындарда Яндекс Еда – 218,6 млн доллар, Ozon – 195,3 млн доллар, Wolt – 191,7 млн доллар және Glovo – 110,8 млн доллар.
2025 жылғы онлайн-түсім бойынша, $ млн
Ұяшық көлемі платформаның 2025 жылғы онлайн-түсімінепропорционал. Көрсеткіштер бүтін санға дейін дөңгелектелген.
Рейтинг интернет арқылы тауар сататын классикалық маркетплейстерден ғана тұрмайды. Оған әуе билеттерін сататын компаниялар, туристік сервистер, тамақ пен азық-түлік жеткізу қызметтері, автокөлік пен жылжымайтын мүлік платформалары және дәстүрлі сауда желілерінің интернет-дүкендері де кірген.
Мәселен, Air Astana-ның онлайн-түсімі 98,2 млн долларға жеткен. Kolesa.kz көрсеткіші – 90,9 млн доллар, Mycar.kz – 81,6 млн доллар.
Қазақстандық ритейлерлер арасында Sulpak 73,2 млн доллар онлайн-түсіммен жоғары орналасқан. Одан кейін «Золотое Яблоко» – 53,7 млн доллар, Technodom – 48,4 млн доллар және Mechta – 25,4 млн доллар.
Билет пен саяхат сегментінде де бірнеше ірі ойыншы бар. Freedom Ticketon-ның көрсеткіші – 65,9 млн доллар, Kino.kz – 50,8 млн доллар, FlyArystan – 49,7 млн доллар, Tickets.kz – 34,3 млн доллар.
Рейтингтің ең қызық тұстарының бірі – алғашқы бірнеше платформа мен қалған ойыншылар арасындағы үлкен айырмашылық. Бірінші орындағы Kaspi Магазиннің онлайн-түсімі миллиардтаған доллармен есептелсе, рейтингтің соңындағы компанияларда бұл көрсеткіш бірнеше миллион, тіпті 1 млн доллардан төмен.
Мәселен, Naimi-дің онлайн-түсімі 1,6 млн доллар, Satu.kz – 1 млн доллар, Chocolife – 0,7 млн доллар, ал рейтингті түйіндеген Squares.kz – 0,4 млн доллар.
Бұл Қазақстандағы онлайн нарықтың ауқымы кеңейгенімен, негізгі айналымның ірі платформалар төңірегінде шоғырланғанын көрсетеді.
- Соңғы
Күнделікті жаңалықтар
8 қыркүйек 2026
