Спорткар ауада төңкерілді: Tesla жаңа Roadster-ді таныстырды
Tesla компаниясы жаңа буындағы Roadster электр спорткарын таныстырды. Тұсаукесерде спорткар арнайы көлбеу жолмен жүріп, ауаға көтерілді. Содан кейін ауада төңкеріліп, қайтадан төрт дөңгелегімен жерге қонды. Ерекше жүйені әзірлеуге SpaceX инженерлері де қатысқан, деп хабарлайды КурсивАвто.
Autoblog мәліметінше, тұсаукесер 15 қазанда Техас штатында өткен. Айта кетейік, Tesla Roadster спорткары тоғыз жыл бұрын таныстырылған еді. Енді компания модельдің жаңа буынын көрсетті.
Футуристік спорткар арнайы рампамен төңкерілген күйде жүріп, одан көтерілгеннен кейін ауада айналып, қайта жерге қонды.
Тағы бір көріністе спорткар бірнеше көліктің үстінен секіріп өтті.
Жаңа Roadster көлігінің әуедегі маневрлеріне көмектесу үшін түбіне қысым күшін тудыратын желдеткіштер мен сығылған газды шығаратын 10 реактивті қондырма орнатылған. Carscoops мәліметінше, сығылған ауа әрқайсысының көлемі 600 литр болатын екі резервуарда сақталады. SpaceX инженерлерінің қатысуымен әзірленген жүйе көліктің ауада маневр жасауына мүмкіндік беруі тиіс.
Tesla көліктің орнынан 96 км/сағ жылдамдыққа небәрі 0,81 секундта үдейтінін де мәлімдеді. Алайда тұсаукесерде бұл нәтиженің қалай өлшенгені түсіндірілмеді. Ал спорткардың ең жоғары жылдамдығы 370 км/сағ болады деп көрсетілді.
Tesla компаниясының ресми сайтында спорткардың үш нұсқасы көрсетілген: Performance, Thrust және Rocket.
Rocket нұсқасы көліктің жерден көтерілуіне мүмкіндік беретін реактивті қондырмалармен жабдықталады. Ол арнайы шақыру арқылы ғана қолжетімді болады. Бұл нұсқа бір адамға арналған және ортақ жолдарда жүруге арналмаған.
Thrust нұсқасында да реактивті жүйе болады. Ал Performance екі адамға арналған.
Tesla Roadster сериялық нұсқасының толық техникалық сипаттамалары әзірге жарияланған жоқ. Компания спорткар өндірісін 2028 жылы бастауды жоспарлап отыр. Жаңа буын Roadster прототипі алғаш рет 2017 жылы көрсетілгенімен, оның өндірісін бастау мерзімі бірнеше рет кейінге шегерілді.
Тағы да оқыңыз: Tesla алғаш рет екі доңғалақты көлік шығарды.
- Соңғы
Күнделікті жаңалықтар
16 қазан 2026
