Қазақстандықтар жүргізуші куәлігін алу үшін емтиханды онлайн тапсыруы мүмкін
Қазақстанда жүргізуші куәлігін алу үшін теориялық емтиханды қашықтан тапсыруға рұқсат берілуі мүмкін. Бұл туралы премьер-министрдің орынбасары – жасанды интеллект және цифрлық даму министрі Жаслан Мадиев депутаттық сауалға берген жауабында мәлімдеді, деп жазады Kursiv.Media.
Қыркүйек айында құрылтай депутаты Мейраш Шынасылова Ұлттық тестілеу орталығы мен Мемлекеттік қызмет істері агенттігінің аумақтық бөлімшелері базасында теориялық емтихан тапсыратын қосымша алаңдар ашу мүмкіндігін қарастыруды ұсынған еді. Депутаттың пікірінше, бұл қадам кезекті азайтып, емтихан тапсырудың қолжетімділігін арттырады.
Жаслан Мадиевтің айтуынша, Агенттіктің инфрақұрылымы тар арнаулы бағытқа арналғандықтан, оны басқа емтихандар өткізуге пайдалануға болмайды.
Дегенмен ЖИ және цифрлық даму министрлігі Ұлттық тестілеу орталығымен оның Астанадағы қуаттылығын пилоттық режимде пайдалану туралы келісімге келді. Тараптар тиісті бірлескен бұйрыққа қол қойып, техникалық дайындықты аяқтады. Жаңашылдықты қазан айында іске қосу жоспарланып отыр. Кейіннен мұндай формат басқа өңірлерде де енгізілуі мүмкін.
«Сонымен бірге жасанды интеллект пен бақылау технологияларын қолдана отырып, қашықтан теориялық емтихандар тапсыруды енгізу мәселесін де қарастырып жатырмыз. Бұл Мамандандырылған халыққа қызмет көрсету орталықтарына түсетін жүктемені азайтады», – делінген министрдің жауабында.
Сонымен қатар Мейраш Шынасилова арадағы өзге тұлғаларды толықтай алып тастап, емтиханға жазылуды тек eGov және eGov Mobile арқылы жүргізуді ұсынды. Қазіргі уақытта тіркелу «ЦОН» мобильді қосымшасы арқылы жүзеге асырылады. Вице-премьер мемлекеттік органдар бұл қызметті электронды үкімет платформаларында қосымша іске қосуды қарастырып жатқанын атап өтті.
Депутаттың өзге де бастамаларының арасында Мамандандырылған ХҚКО-лардың жұмыс уақытын сағат 20:00-ге дейін ұзарту ұсынысы болды.
Алайда вице-премьер жұмыс кестесін өзгерту қызметкерлер санын көбейтуді немесе ауысымды жұмыс режимін енгізуді талап ететінін хабарлады. Осыған байланысты министрлік бұл идеяны жүзеге асыруды мақсатқа сай емес деп есептейді.
Бұған дейін Ішкі істер министрлігі жүргізуші куәлігін алу тәртібі өзгергенін хабарлаған еді.
- Соңғы
Күнделікті жаңалықтар
15 қазан 2026
