Министрлік Алматыдағы оқушылары уланған мектеп басшылығына ескерту жасады
Қазақстанның Оқу-ағарту министрлігі Алматыдағы Республикалық физика-математика мектебінде (РФММ) болған жағдайға байланысты шұғыл шаралар қабылдап жатыр.
Мектеп басшылығына оқушылардың тамақтануын ұйымдастыру мен санитариялық талаптардың сақталуын бақылауды күшейту тапсырылды.
Министрліктің мәліметінше, қазір оқиға орнында Балалардың құқықтарын қорғау комитетінің, тиісті аумақтық органдардың және «Өркен» балалардың әл-ауқатын арттыру ұлттық ғылыми-практикалық институтының өкілдері қатысқан мониторинг тобы жұмыс істеп жатыр.
Денсаулық сақтау министрлігінің ақпараты бойынша, мектептің ас блогында санитариялық талаптардың бұзылғаны анықталған. Осыған байланысты шектеу шаралары енгізіліп, оқиғаның мән-жайы тексеріліп жатыр.
«Оқу-ағарту министрлігі РФММ Директорлар кеңесі мен басқармасына тамақтануды ұйымдастыруды және санитариялық талаптардың сақталуын бақылауды күшейтуді, сондай-ақ оқушылардың қауіпсіздігін қамтамасыз етуді тапсырды», – деп хабарлады ведомство.
Оқушылардың қауіпсіздігін сақтау және оқу процесінің үздіксіздігін қамтамасыз ету мақсатында сабақтар уақытша қашықтан оқыту форматына ауыстырылды.
Министрлік қазір оқушылардың қауіпсіздігі мен құқықтарын қорғауға, жағдайдың барлық мән-жайын анықтауға және тексеру нәтижелері бойынша қажетті шараларды қабылдауға басымдық беріліп отырғанын атап өтті. Жағдай Оқу-ағарту және Денсаулық сақтау министрліктерінің бақылауында.
14 қазандағы мәлімет бойынша, ауру жұқтырудың 48 жағдайы тіркелген. Науқастардың барлығы ауруханаға жатқызылған, жағдайлары тұрақты. Жансақтау көмегіне мұқтаж науқастар жоқ.
Тексеру қорытындысы бойынша жиналған материалдар заңнамада белгіленген тәртіппен процестік шешім қабылдау үшін құқық қорғау органдарына жолданды.
Бұған дейін емделіп жатқан оқушылардың уақытша қашықтан оқитыны, ал мектеп-интернаттағы балалардың ата-аналарына немесе туыстарына жіберілетіні хабарланған еді.
- Соңғы
Күнделікті жаңалықтар
14 қазан 2026
