Алматыда тапаншамен жүрген әйел ұсталды
Алматыда полицейлер 9 миллиметрлік тапанша мен бес оқ-дәрі алып жүрген әйелді ұстады. Әйел қаруды Есентай өзенінің маңынан тауып алғанын айтқан.
Қалалық полиция департаментінің мәліметінше, күдікті Жетісу ауданында сағат 17:00 шамасында есірткі қылмысына қарсы күрес бөлімшесінің қызметкерлері жүргізген шара барысында ұсталған. Тапанша мен оқ-дәрілер тәркіленді.
Ұсталған әйелдің айтуынша, ол қаруды полицейлерге жолыққанға дейін бір-екі сағат бұрын тауып алған. Оның сөзінше, тапанша Есентай өзеніне түсетін жердегі бетон қоршаудың үстінде жатқан.
«Алайда бұл нұсқа әлі де тексеруді қажет етеді. Ұсталған әйелдің әрекетіне құқықтық баға беріледі», – деп хабарлады полиция.
Аталған факті бойынша қылмыстық іс қозғалды. Қазір тәртіп сақшылары тапаншаның қайдан шыққанын және оның әйелдің қолына қандай жағдайда түскенін анықтап жатыр.
- Соңғы
Күнделікті жаңалықтар
14 қазан 2026
