Қырғызстанда президенттікке алғашқы үміткер өз кандидатурасын ұсынды
Қырғызстанның Орталық сайлау комиссиясына кәсіпкер Аймен Қасенов президенттік сайлауға өзін-өзі ұсыну тәртібімен қатысу туралы өтініш берді.
24.kg хабарлауынша, Аймен Қасеновтің бизнесте 25 жылдық тәжірибесі бар. Ол бұған дейін Ресей-Қырғыз даму қоры басқармасының мүшесі, «Газпромнефть-Қазақстан» компаниясының бас директоры қызметтерін атқарған. Сондай-ақ Бішкек қаласы әкімінің кеңесшісі болып жұмыс істеген.
Егер Орталық сайлау комиссиясы оның кандидатурасын тіркесе, Қасенов президенттік сайлауға екінші рет қатысады. Ол 2021 жылғы сайлауда да бақ сынап, сайлаушылардың 1 пайызынан аз дауысын жинаған.
Қырғызстанда президенттікке кандидаттарды ұсыну мерзімі 2026 жылғы 13 қарашаға дейін жалғасады. Одан кейін Орталық сайлау комиссиясы үміткерлерді тіркеу және сайлауға дайындық жұмыстарын жүргізеді.
Қырғызстандағы президент сайлауы 2027 жылғы 27 қаңтарға белгіленген. Бұған дейін қазіргі мемлекет басшысы Садыр Жапаров алдағы сайлауға қатысу ниеті бар екенін мәлімдеген.
- Соңғы
Күнделікті жаңалықтар
15 қазан 2026
