«Самұрық-Қазына» қоры облигация арқылы 1,5 млрд доллар қарыз тартпақ
«Самұрық-Қазына» ұлттық әл-ауқат қоры 1,5 млрл долларлық бағдарлама аясында қытай юаніндегі (CNH) дим-сам облигацияларын орналастыруды бастады.
Пайыздың мөлшерлемелері нарық жағдайына қарай анықталатын ноталардың айналым мерзімі 3 жыл, 5 жыл және 10 жыл болып жоспарланған.
Қор инвесторлармен өткізген алғашқы келіссөздер барысында үш жылдық транш үшін табыстылық көрсеткіші шамамен 2,7%, ал бес жылдық транш үшін шамамен 2,85% деңгейінде белгіленгенін мәлімдеді.
Бұл мәміленің халықаралық деңгейдегі ұйымдастырушылары мен букраннерлері қатарында Citigroup, Standard Chartered, Bank of China және басқа да ірі жаһандық банктер бар.
Қор аталмыш бағалы қағаздарды KASE, Астана халықаралық биржасы (AIX), сондай-ақ Лондон мен Гонконг қор биржаларында орналастырады.
Тартылған қаражат жалпы корпоративтік мақсаттарға жұмсалады. Еске сала кетейік, бұған дейін сәуір айында қор Қытайдың ішкі нарығында 3 миллиард юань көлемінде «панда-облигацияларды» орналастырып, бұл бағытта Орталық Азиядан шыққан алғашқы эмитент атанған еді.
«Самұрық-Қазына» — еліміздің стратегиялық кәсіпорындарын басқаратын және жалпы ішкі өнімнің шамамен 7,5%-ын құрайтын негізгі инвестициялық холдинг. Қордың жалғыз акционері — Қазақстан Республикасының Үкіметі.
- Соңғы
Күнделікті жаңалықтар
15 қазан 2026
