Кеңес Рақышев британ инвесторының активтерін 304,6 млн долларға сатып алды
Британдық Nostrum Oil & Gas компаниясы Қазақстандағы екі ірі активін – «Жайықмұнай» мен POSITIV Invest серіктестігін сату келісімін аяқтады. Бұл мәміленің бағасы 304,6 млн долларды құрады, деп хабарлайды Kursiv.Media.
Сатып алушы тарап – Астана халықаралық қаржы орталығында (АХҚО) тіркелген Altaris Holding Ltd компаниясы. Бұл холдингтің 49%-ын кәсіпкер Кеңес Рақышевке тиесілі Fincraft Energy Holding Limited құрылымы бақылайды.
Келісім шарттарына сәйкес, «Жайықмұнай» мен POSITIV Invest активтерін және оларға байланысты кредит міндеттемелерін қамтитын келісім 15 қазанда жабылды.
Төленген соманың 10 миллион доллары кепілдік талаптарын жабу үшін кепілдік ретінде арнайы шотта кем дегенде алты айға қалдырылды. Алынған қаржы есебінен Nostrum өзінің қамтамасыз етілген облигацияларын толық өтеп, қамтамасыз етілмеген борыштарының бір бөлігін жапты.
Осылайша, компания елдегі 30 жылға жуық қызметін аяқтап, өз бизнесін бақылаулы түрде жою (Managed Wind-Down) процесіне көшті. 1997 жылдан бері Nostrum Қазақстанның мұнай-газ секторына 2,5 миллиард доллардан астам инвестиция салған.
Сатып алынған негізгі активтердің бірі – «Жайықмұнайға» тиесілі газ өңдеу зауыты. Зауыттың жылына 4,2 млрд текше метр газ өңдеуге қуаты жетеді.
Сонымен қатар POSITIV Invest Батыс Қазақстан облысындағы «Каменское» және «Каменско-Тепловско-Токаревское» кен орындарын игеру құқығына ие.
Жаңа қожайын – Кеңес Рақышев бұл активтер негізінде газды қайта өңдейтін екі кластерлік платформа құруды көздеп отыр.
Бұл инфрақұрылымдар болашақта Қарашығанақ кен орнының шикі газын өңдеуге де пайдаланылуы мүмкін.
Кеңес Рақышев Forbes журналының Қазақстандағы ең бай бизнесмендер рейтингінде 27-орында тұр. Оның дәулеті 402 миллион долларға бағаланған.
- Соңғы
- Қазан, 19
-
-
-
-
-
-
-
-
-
-
-
-
-
-
-
-
-
-
Күнделікті жаңалықтар
20 қазан 2026
