Президент Қазақстан жастарына үндеу жолдады

12.08.2026, 18:35 kz.kursiv.media

Астанада «Тәуелсіздік ұрпақтары» гранттар конкурсының жеңімпаздарын марапаттау рәсімі өтті. Халықаралық жастар күніне арналған салтанатты іс-шара өтті.

Елордада еліміздің барлық өңірінен келген 3000-ға жуық белсенді жас: еріктілер, ғалымдар, кәсіпкерлер, жастар ұйымдарының өкілдері, жастар ресурстық орталықтарының мамандары, мемлекеттік органдардың өкілдері, қоғам қайраткерлері, өнер адамдары мен спортшылар бас қосты.

Жастарға құттықтау сөзін Қазақстан президенті жолдады. Мемлекет басшысының үндеуін премьер-министрдің орынбасары – мәдениет және ақпарат министрі Аида Балаева оқып берді.

Қасым-Жомарт Тоқаев жастар – қоғамның қозғаушы күші, жасампаз идеялардың қайнар көзі екенін атап өтті. Қазақстандық ұл-қыздар халықаралық білім және ғылыми байқауларда, спорттық жарыстарда жоғары нәтижелер көрсетіп, көк туымызды биікке көтеріп жүр.

«Жастарды қолдау саясаты әрдайым мемлекетіміздің негізгі басымдықтарының бірі болып қала береді. Бүгінде республиканың барлық өңірінде жаңа мектептер, спорт нысандары мен даму орталықтары салынуда. Ауқымды жобалар жүзеге асырылып, талантты жастарға жан-жақты қолдау көрсетілуде. Бүгін табысталатын «Тәуелсіздік ұрпақтары» гранты – соның жарқын дәлелі. Үздіктердің үздігін анықтауға бағытталған конкурс прогрессивті, отансүйгіш, білімді және еңбекқор жас азаматтарды біріктірді. Қасиетті Отанымыздың болашағы – сіздердің қолдарыңызда! Бүгінде еліміздің өмірінің барлық саласында іргелі реформалар жүргізілуде. Жалпыхалықтық референдумда халқымыз бірауыздан қолдаған жаңа Конституция ауқымды өзгерістерге жаңа серпін беріп, Қазақстанның одан әрі дамуы мен өркендеуіне жол ашты», – делінген үндеу мәтінінде.

Президент Ата заңда адами капиталды, білімді, ғылым мен инновацияларды дамыту стратегиялық бағыт ретінде айқындалғанын атап өтті. Сонымен қатар, алғаш рет еліміздің басты құжатында еріктілік қызметін мемлекеттік қолдау тікелей бекітілген.

«Осылайша, біз қоғамда өркениетті ұлтқа тән жаңа этиканы орнықтырып, «Таза Қазақстан» және «Адал азамат» қағидаттарын қоғамдық санаға дәйекті түрде енгізіп жатырмыз. Жоғары беделге ие мемлекет ретінде Қазақстан сенімді даму жолына түсіп, тарихи өрлеу дәуіріне қадам басты. Біздің еліміз ауқымды цифрландыруды белсенді жүргізіп, жасанды интеллект технологияларын барлық салаға енгізуде. Түптеп келгенде, біздің мақсатымыз – Заң мен Тәртіп үстемдік ететін, экономикалық тұрғыдан қуатты, Әділетті, Озық, Қауіпсіз және Таза Қазақстан құру. Жаңалыққа ұмтылған, игі бастамалардың алдыңғы қатарында жүрген жігерлі жастар кез келген биікті бағындыра алады. Мен бұған нық сенемін! Баршаңызға табыс тілеймін! Алдарыңыздан барлық жол ашылсын! Қасиетті Отанымыз – Қазақстанымыз өркендей берсін!» – делінген президенттің құттықтауында.

Сонымен қатар, іс-шара аясында «Тәуелсіздік ұрпақтары» гранттар конкурсының жеңімпаздарын марапаттау рәсімі өтті.

Салтанатты іс-шара мерекелік концертпен аяқталды.