Ресейден мыңнан астам жүк көлігін заңсыз өткізген шенеунік 10 жылға сотталды
Батыс Қазақстан облысындағы мемлекеттік кірістер департаментінің бұрынғы лауазымды тұлғасы 100 миллион теңге пара алғаны үшін 10 жылға бас бостандығынан айырылды, деп хабарлайды Kursiv.Media.
Астананың қылмыстық істер жөніндегі мамандандырылған ауданаралық соты тиісті үкімді 4 қарашада шығарды.
Тергеу барысында анықталғандай, 2025 жылдың қыркүйек-қазан айлары аралығында Ресей азаматы Ресейден Қазақстанға бағыт алған 1 003 жүк көлігін өткізу бекеттерінен кедергісіз өткізу үшін шенеунікке пара берген. Бұдан бөлек, шенеунік оған тәуекелдерді басқару жүйесіне түскен компаниялар туралы мәліметтерді беріп, шектеулерді айналып өтуге кеңес беріп отырған.
Қылмыстық іске қатысы болған екінші айыпталушы пара беру қызметі үшін 24,8 миллион теңге алған. Сот оны 1 жыл 6 айға бас бостандығынан айырды.
Сондай-ақ, сот екі сотталушының да мүлкін тәркілеуді, белгілі бір лауазымдарды өмір бойы атқаруға тыйым салуды және қылмыстық жолмен табылған қаражатты мемлекет кірісіне өндіруді міндеттеді.
Сот үкімі әлі заңды күшіне енген жоқ.
Айта кетейік, осыған дейін елге ұшақпен келетін азаматтар құны 10 000 еуроға дейінгі және салмағы 50 кг-ға дейінгі жеке заттарды бажсыз кіргізе алатынын жазған едік.
- Соңғы
Күнделікті жаңалықтар
6 қараша 2026
