Орта және шағын бизнеске мораторий енгізу мәселесі түпкілікті шешілген жоқ
Орта және шағын бизнесті тексеруге қосымша мораторий енгізу мәселесі әзірге түпкілікті шешілген жоқ, деп хабарлайды Kursiv.Media.
Бұл туралы ҚР Ұлттық экономика министрлігінің бірінші вице-министрі Азамат Әмрин редакцияның ресми сауалына берген жауабында мәлімдеді.
Министрлік бұл бастаманы Құрылтай депутаттарымен бірлесіп қарастыратынын хабарлады.
«Қазақстанда шағын және орта бизнеске қатысты тексерулерге қосымша мораторий енгізу мәселесі қарастырылуда. Кәсіпкерлерге түсетін әкімшілік жүктемені азайту мақсатында шағын және орта бизнеске қатысты мемлекеттік бақылау жүйесін жетілдіру жұмыстары жүргізіліп жатыр», – делінген министрліктің жауабында.
Әйтсе де, министрлік бұл мәселеде мемлекет, бизнес және азаматтар мүдделерінің теңгерімін сақтау, сондай-ақ олардың құқықтары мен заңды мүдделерін қорғау қажеттілігін ескермек.
Әмриннің мәліметінше, қолданыстағы заңнама бойынша шағын кәсіпкерлік субъектілері, оның ішінде микрокәсіпкерлік өкілдері, мемлекеттік тіркелген күннен бастап үш жыл бойы мемлекеттік бақылау мен қадағалаудан босатылған. Алайда заңда көзделген жекелеген жағдайлар бұған кірмейді.
Айта кететін жайт, кәсіпкерлікті қолдау саласында ұзақ мерзімді қаржыландыру, технологиялық жаңғырту және әкімшілік қысымды төмендету тетіктерін қамтитын Орта бизнесті дамыту жоспары әзірленбек.
- Соңғы
Күнделікті жаңалықтар
6 қараша 2026
