Теңгелей табыс: банктер депозитке қанша пайыз ұсынады

05.11.2026, 21:09 kz.kursiv.media

Елде инфляция баяулап, базалық мөлшерлеменің төмендеуі депозит ставкаларына да әсер етуде. Теңгемен жинақ сақтайтындар үшін банктердің ұсынысы әртүрлі: бірінде ақшаны толықтырып, қажет кезде алуға болады, екіншісінде жоғары мөлшерлеме үшін қаражатты белгілі мерзімге қалдыру керек. 2026 жылғы 4 қарашадағы кестелерде жылдық тиімді сыйақы мөлшерлемесі 19,02%-ға дейін жетеді.

Депозит таңдағанда көз алдымен пайызға түседі. Алайда сол көрсеткіштің артында күнделікті тұрмысқа әсер ететін шарттар бар. Жинақты ай сайын толықтыруға бола ма? Күтпеген шығын туындаса, ақшаның бір бөлігін алуға мүмкіндік бар ма? Әлде қаражат мерзімі біткенше шотта жатуы керек пе? Банктер ұсынатын табыстылық осы мүмкіндіктерге қарай өзгереді.

Толықтыру және ақша алу мүмкіндігі бар депозиттер санатында Freedom Bank алда тұр. Оның 13 айлық «Жинақ сандықшасы» депозитінде номинал мөлшерлеме — 15,23%, ал жылдық тиімді сыйақы мөлшерлемесі (ЖТСМ) — 16,35%.

Оған жақын ұсыныс Home Credit банкінде бар. Банктің 13 айлық «Қарапайым» депозиті бойынша номинал мөлшерлеме 15,10%-ды, ЖТСМ 16,30%-ды құрайды. Екі ұсыныстың тиімді мөлшерлемесі арасындағы айырма небәрі 0,05 пайыздық тармақ.

Үздік үштікті Bereke Bank-тің алты айлық «Эксклюзив» депозиті толықтырады: номинал мөлшерлемесі — 15,02%, ЖТСМ — 16,10%. KMF банкінің 13 айлық «Мерзімді» депозитінде тиімді мөлшерлеме 16,08%-ға тең.

Бұл санаттағы ұсыныстар жинағына қолжетімділікті сақтағысы келетіндерге арналған. Дегенмен ақша алу тәртібі, төмендетілмейтін қалдық және сыйақыны сақтау талаптары әр өнімнің шартына байланысты.

Толықтыру және ақша алу мүмкіндігі жоқ депозиттерде мөлшерлемелер жоғарырақ. Ұсынылған кестедегі ең жоғары көрсеткіш — Нұрбанктің үш және алты айлық «Жинақ депозитінде». Екі мерзім үшін де номинал мөлшерлеме 17,52%, ЖТСМ 19,02% болып көрсетілген.

Келесі орында Еуразиялық банктің алты айлық «Turbo жинақ» депозиті тұр. Оның номинал мөлшерлемесі — 16,96%, тиімді мөлшерлемесі — 18,52%.

KMF банкінің алты айлық «Депозит+» ұсынысында ЖТСМ 18,17%-ға жетеді. Ал KZI Bank-тің үш айлық жинақ депозитінде номинал мөлшерлеме 17,00%-ды, ЖТСМ 18,10%-ды құрайды.

Осылайша, екі санаттағы ең жоғары тиімді мөлшерлемелердің айырмасы — 2,67 пайыздық тармақ. Бұл айырма жинаққа еркін қол жеткізу мүмкіндігі мен қаражатты белгіленген мерзімге орналастыру арасындағы таңдауды айқын көрсетеді.

Номинал мөлшерлеме мен ЖТСМ — екі бөлек көрсеткіш. Ұсыныстарды салыстырғанда олардың қайсысы берілгеніне назар аудару қажет. Сондай-ақ жылдық мөлшерлемені депозиттің нақты мерзімімен шатастырмаған жөн: үш айлық депозитте көрсетілген 19,02% (ЖТСМ) қаражат үш айда сонша өседі дегенді білдірмейді.

Сондықтан ең жоғары пайызбен қатар мерзімді, ең төменгі салымды және қаражатты мерзімінен бұрын қайтару шарттарын да қарау маңызды. Жинақтың тиімділігі салымшының ақшаны қашан және қандай мақсатқа пайдаланатынына да байланысты.