Шымкент пен Измир: Бауырлас қалалар арасындағы жаңа туристік мүмкіндіктер

03.09.2026, 10:20 kz.otyrar.kz

Қалалар арасындағы бауырластық байланыс тек ресми кездесулермен шектелмей, нақты салалардағы ынтымақтастыққа ұласқанда ғана өз нәтижесін береді. Әсіресе мәдениет пен туризм бағытындағы серіктестік халықтар арасындағы байланысты жақындатып, қалалардың бір-бірін кеңінен тануына мүмкіндік береді. Бұл тұрғыдан алғанда, Шымкент пен Түркияның Измир қаласы арасындағы жиырма жылдан астам уақыт бойы қалыптасқан қарым-қатынастың маңызы зор.

Шымкент қаласының өкілдері Измир қаласының мэрі Джемиль Тугаймен кездесіп, екі шаһар арасындағы бауырластық байланысты одан әрі дамыту мәселелерін талқылады. Шымкент пен Измир 2004 жылдан бері бауырлас қалалар ретінде ынтымақтастық орнатып келеді. Ендігі міндет – қалыптасқан байланысты жаңа жобалармен толықтыру.

Кездесуде басымдық берілген бағыттардың бірі – туризм. Екі қаланың өзіндік тарихи және мәдени ерекшеліктері бар. Шымкент – Ұлы Жібек жолы бойындағы тарихы терең, ұлттық мәдениеті мен дәстүрі сақталған шаһар болса, Измир – Түркияның батысындағы Эгей теңізі жағалауында орналасқан, туризм мен мәдениет саласы жақсы дамыған қалалардың бірі. Осындай ерекшеліктер екі қала арасында туристік тәжірибе алмасуға мүмкіндік береді. Измирдің туризмді ұйымдастырудағы тәжірибесін зерделеу Шымкент үшін пайдалы болса, Қазақстанның оңтүстігіндегі тарихи-мәдени мұраны түрік аудиториясына таныстыру да өзара туристік қызығушылықты арттыра алады.

Туризмнің дамуы мәдени байланыспен де тығыз сабақтас. Сондықтан кездесуде мәдениет, білім және ғылым салаларындағы бірлескен бастамаларға да назар аударылды. Ортақ мәдени іс-шаралар, білім беру жобалары мен тәжірибе алмасу бағдарламалары екі қала тұрғындарының бір-бірінің тарихы мен мәдениетін жақынырақ тануына жол ашады.

Бұдан бөлек, тараптар сауда-экономикалық және инвестициялық ынтымақтастықты кеңейту, өнеркәсіптік кооперацияны дамыту, логистикалық байланыстарды нығайту және цифрлық шешімдерді енгізу мәселелерін қарастырды. Бұл бағыттардың дамуы қалалар арасындағы іскерлік байланысты күшейтіп, өз кезегінде туристік және мәдени жобаларды жүзеге асыруға да қосымша мүмкіндік береді.

Қазірдің өзінде Шымкентте түрік капиталының қатысуымен бірқатар жобалар жүзеге асырылып жатыр. Ал Түркия Республикасының Шымкент қаласындағы Құрметті консулдығы екі ел арасындағы мәдени-гуманитарлық және қоғамдық байланысты нығайтуға атсалысуда. Шымкент пен Измирдің бауырлас қала мәртебесіне ие болғанына биыл жиырма жылдан асты. Осы уақыт ішінде қалыптасқан тәжірибе енді жаңа мазмұнмен толықтырылмақ. Әсіресе туризм мен мәдениет саласындағы байланыстардың жандануы екі қаланың тұрғындары мен қонақтарына жаңа мүмкіндіктер ұсынуы мүмкін.

Кездесу қорытындысында тараптар өзара сенімге негізделген серіктестікті жалғастыруға ниетті екенін білдірді. Бауырлас қалалар арасындағы байланыстың нақты жобалармен толығуы Шымкенттің халықаралық туристік және іскерлік кеңістіктегі байланыстарын кеңейтуге ықпал етпек.