Спорт күніне орай бұқаралық және инклюзивті спорттық шаралар өтті

20.08.2026, 08:37 kz.otyrar.kz

Спорт күніне орай Шымкент қаласы Қаратау ауданында тұрғындар мен балаларды спортқа тартуға, салауатты өмір салтын насихаттауға бағытталған бірқатар спорттық іс-шара ұйымдастырылды. Мерекелік күн аясында балалар мен жасөспірімдер арасында «Аула чемпионаты» өтіп, Дендросаябақта қала тұрғындары мен спортсүйер қауымның қатысуымен велошеру ұйымдастырылды. Сонымен қатар, спорт апталығының бағдарламасына сәйкес ерекше қажеттіліктері бар азаматтарға арналған «Ерекше күн» атты инклюзивті спорттық шарасы өтті.

Қаратау ауданында ұйымдастырылған «Аула чемпионаты» балалар мен жасөспірімдердің бос уақытын тиімді әрі пайдалы өткізуіне жағдай жасауға, оларды спортпен тұрақты айналысуға баулуға және салауатты өмір салтын қалыптастыруға бағытталды. Жарыс барысында балалар өзара бақ сынап, спорттық шеберліктерін көрсетті. Қатысушылар командалық ойындарға белсене қатысып, ұйымшылдық пен бірлескен әрекеттің маңызын сезінді. Спорттық дода балалардың белсенділігін арттырып қана қоймай, олардың өзара достық қарым-қатынасын нығайтуға мүмкіндік берді.

Ал Спорт күніне орай Дендросаябақта қала тұрғындары мен спортсүйер қауымның қатысуымен велошеру өтті. Оның басты мақсаты – салауатты өмір салтын насихаттау, тұрғындарды белсенді өмір салтына тарту және спортты күнделікті өмірдің ажырамас бөлігіне айналдыру. Велошеруге қатысушылар таңғы уақытты таза ауадағы белсенді серуенмен бастап, спорттық көңіл күй қалыптастырды. Қала тұрғындарының қатысуымен өткен бұқаралық шара спортпен айналысудың қолжетімді әрі тиімді түрлерінің бірі ретінде көпшіліктің белсенділігін арттыруға бағытталды.

Спорт апталығы аясындағы маңызды шаралардың бірі «Ерекше күн» атты инклюзивті спорт күні болды. Іс-шараға ерекше қажеттіліктері бар спортшылар қатысып, садақ атудан жарыс өткізілді. Жарыс барысында қатысушылар өздерінің спорттық шеберлігі мен мергендік қабілеттерін сынап, сайысқа белсенді қатысты. Спортшылар нысана көздеп, дәлдік пен жинақылықтарын көрсетті. Садақ атудан өткен бәсекеде қатысушылар өзара бақ сынап, жоғары нәтижеге ұмтылды. Жарыс қорытындысы бойынша жеңімпаздар мен жүлдегерлер дипломдармен марапатталды. Бұл шара қатысушылардың спорттық жетістіктерін атап өтіп, олардың спортқа деген қызығушылығын арттыруға мүмкіндік берді.

«Ерекше күн» инклюзивті спорттық іс-шарасының негізгі мақсаты – инклюзивті спортты дамыту, ерекше қажеттіліктері бар азаматтарды спортқа тарту және олардың спорттық әлеуетін арттыруға жағдай жасау. Шара барысында спорттың баршаға ортақ екенін көрсетіп, әр адамның өз мүмкіндігіне сай белсенділік танытуына мүмкіндік берілді.

Осылайша, Спорт күні мен спорт апталығы аясында өткен «Аула чемпионаты», велошеру және «Ерекше күн» инклюзивті спорттық шарасы әртүрлі жастағы тұрғындарды спортқа тартуға бағытталды. Балалар мен жасөспірімдер спорттық жарыстарда бақ сынаса, қала тұрғындары велошеруге қатысып, ал ерекше қажеттіліктері бар спортшылар садақ атудан өз шеберліктерін көрсетті. Аталған шаралар спортпен тұрақты айналысудың маңызын насихаттап, тұрғындардың белсенді өмір салтына деген қызығушылығын арттыруға бағытталды. Спорт күні осындай бұқаралық және инклюзивті шаралармен мазмұнды өтті.

Төлеген Абдрасилов