Шымкент әуежайында жолаушы әйелдің сөмкесінен патрон табылды
Шымкент әуежайында тексеру кезінде жолаушы әйелдің сөмкесінен тегіс ұңғылы аңшылық қаруына арналған патрон табылды. Әйелге 60 мың теңге көлемінде айыппұл салынды, деп хабарлайды Кursiv.Media.
Іс Тараз қаласының мамандандырылған әкімшілік құқық бұзушылықтар жөніндегі сотында қаралған. Сот материалдарына сәйкес, 2026 жылғы тамызда Тараз тұрғыны Шымкент – Жезқазған бағыты бойынша ұшуға дайындалған. Әуежай қызметкерлері тексеру барысында оның сөмкесінен 12 калибрлі патрон тапқан. Сараптама патронның зауытта жасалғанын және атуға жарамды екенін растады.
Сот отырысында әйел өз кінәсін мойындаған. Алайда патронның сөмкесіне қалай түскенін есіне түсіре алмағанын айтқан.
Тараз қаласының мамандандырылған әкімшілік құқық бұзушылықтар жөніндегі соты әйелді Әкімшілік құқық бұзушылық туралы кодекстің 482-бабының 1-бөлігі бойынша кінәлі деп таныды. Аталған бапта 20 АЕК көлемінде айыппұл қарастырылған. Алайда сот оның кінәсін мойындағанын, өкінгенін, құқық бұзушылықты алғаш рет жасағанын және ауырлататын мән-жайлардың болмағанын ескеріп, айыппұл мөлшерін 30%-ға төмендетті.
Нәтижесінде жолаушыға 60 мың теңге айыппұл салынды. Тәркіленген патрон жойылуға жатады. Сот қаулысы заңды күшіне енді.
Бұған дейін FlyArystan жолаушысының бомба туралы әзілінен кейін рейстен түсірілген еді.
- Соңғы
Күнделікті жаңалықтар
15 қыркүйек 2026
