Қазақстанда балабақша кезегі жеті есеге жуық қысқарды
Қазақстанда ваучерлік қаржыландыру пилоттық режимде енгізілгелі бері балабақша кезегіндегі балалар саны жеті есеге жуық қысқарды. Алғашында кезекте 160 мың бала тұрса, қазір олардың саны шамамен 23 мыңға дейін азайған. Бұл туралы Үкіметтің баспасөз қызметі хабарлады.
Ваучерлік қаржыландыру қазірдің өзінде 20 қала мен 23 ауданда жұмыс істеп тұр. Бұл жүйе бойынша ата-аналар балабақшаны өздері таңдай алады, ал қаржы нақты балаға бөлінеді.
Соңғы үш жылда Қазақстанда мектепке дейінгі білім беру ұйымдарында 232 мың орын ашылды. Қазір елде 12 мыңнан астам балабақша жұмыс істейді, онда 1 миллионнан астам бала тәрбиеленіп жатыр. 2027 жылдың соңына дейін тағы 68 мың орын ашу жоспарланған.
Сонымен қатар билік мектептегі білім беру жүйесін де жаңғыртуды жалғастырып жатыр. Соңғы бес жылда Қазақстанда 1 миллионнан астам оқушыға арналған 1120 мектеп салынды.
Олардың 217-сі 460,4 мың оқушыға арналған «Келешек мектептері». Қазір тағы 59,3 мың орынға шақталған 101 мектеп салынып жатыр.
Биыл екі өңірдегі шағын жинақты мектептерде жасанды интеллектіні қолдану сынақтан өткізіле бастады. Пилоттық жоба Павлодар және Қызылорда облыстарында жүзеге асырылып жатыр. Алғашқы кезеңде оған 500 мектеп қатысады.
Жасанды интеллект оқушының деңгейіне қарай тапсырмалар іріктеу, оның оқу нәтижелерін талдау және біліміндегі олқылықтарды анықтау үшін қолданылмақ.
2029 жылға қарай жобаны Қазақстандағы барлық 2,5 мың шағын жинақты мектепке енгізу жоспарланып отыр.
Тағы да оқыңыз: Балабақша ваучері кімге беріледі және оны қалай алуға болады.
- Соңғы
Күнделікті жаңалықтар
15 қыркүйек 2026
