Жүргізуші куәлігіне практикалық емтихан тапсыруға жеке автодромдарды тарту ұсынылды
Құрылтай депутаты Мейраш Шынасилова жүргізуші куәлігін алу процесін цифрландырып, жеделдету мәселесін көтерді, деп хабарлайды Kursiv.Media.
Жасанды интеллект және цифрлық даму, ішкі істер министрлеріне жолданған сауалда депутат арнайы халыққа қызмет көрсету орталықтарында емтиханды кейде 6 айға дейін күтуге туралы келетінін айтады. Сондықтан ол емтихан қабылдау орындарының санын көбейтіп, мемлекеттік органдардың мүмкіндіктерімен қатар жеке сектордың әлеуетін де пайдалану қажет екенін атап өтті.
«Біріншіден, теориялық емтиханға жазылу және кезекті қысқарту мәселесі. Мамандандырылған ХҚКО-лардың жұмыс уақытын азаматтарға ыңғайлы болу үшін сағат 20:00-ге дейін ұзарту және емтихан қабылдаушылардың ауысымдық жұмысын ұйымдастыру мүмкіндігін қарастыру қажет. Сонымен қатар, теориялық емтихандарды қабылдау үшін қосымша алаңдарды – Ұлттық тестілеу орталығының және Мемлекеттік қызмет істері агенттігінің аумақтық бөлімшелерінің базасында ұйымдастыру мүмкіндігін қарастырған жөн. Бұл, кезекті азайтуға және азаматтардың емтихан тапсыру мүмкіндігін арттыруға ықпал етер еді», – дейді ол.
Мейраш Шынасилова практикалық емтиханға кезек мәселесі де күйіп тұрғанын жеткізді.
«Қазіргі кезде практикалық емтихан негізінен мамандандырылған ХҚКО-лардың автодромдарында ғана қабылданады. Мысалы, халық саны агломерацияны қоса алғанда 2 миллионға жуық Астана қаласында бір ғана автодромның болуы, мәселенің ауқымын көрсетуде», – дейді депутат.
Ол осы ретте жеке сектордың мүмкіндігін пайдалануды ұсынады. Практикалық емтихан қабылдауға қойылатын бірыңғай техникалық, қауіпсіздік және ұйымдастырушылық талаптарды белгілеп, осы талаптарға сәйкес келетін жеке автодромдарды аккредиттеу арқылы емтихан қабылдауға тарту мүмкіндігін қарастыру қажеттігін айтады.
Мейраш Шынасилова емтиханға жазылу кезінде делдалдардың қызметін болдырмау үшін жазылуды тек eGov және eGov Mobile арқылы жүзеге асыруды және бос орындарды автоматты түрде бөлудің ашық әрі қорғалған тетігін енгізуді ұсынды. Оның ойынша, бұл кезекті сатып алу-сатуға жол бермей, емтиханға жазылу мүмкіндігін барлық азаматтар үшін тең қамтамасыз етуге мүмкіндік береді.
Бұған дейін, 65 жастан асқан көлік жүргізушілері медициналық тексерістен қалай өтуі керектігі туралы жазғанбыз.
- Соңғы
Күнделікті жаңалықтар
16 қыркүйек 2026
