«Жетісу» клубы жалақы дауына қатысты ресми мәлімдеме жасады
Талдықорғандық «Жетісу» футбол клубы ойыншылардың бірнеше айдан бері жалақы алмағаны туралы ақпаратқа қатысты ресми мәлімдеме жасады. Клуб басшылығы футболшылар алдындағы барлық қаржылық міндеттемелер толық орындалғанын хабарлады.
Бұған дейін KazFootball.kz басылымы «Жетісудың» шетелдік футболшылары шілде айынан, ал қазақстандық ойыншылары тамыз айынан бері жалақы алмағанын жазған. Ақпаратқа сәйкес, негізгі құрамдағы ойыншылар Жетісу облысының әкімі Бейбіт Исабаевқа хат жолдап, мәселені шешуге көмектесуді сұраған.
Клубтың ресми мәлімдемесінде төлемдердің кешіктірілуі Қазақстан заңнамасының талаптарына сәйкес құқықтық талдау жүргізу, келісу және тиісті шешімдер қабылдау рәсімдеріне байланысты болғаны айтылған.
«Жетісу» клубының мәліметінше, облыстық дене шынықтыру және спорт басқармасы мен клуб басшылығы бірлесіп жұмыс жүргізіп, туындаған мәселелерді реттеген.
«Қазіргі уақытта футболшыларға тиесілі барлық төлемдер толық көлемде төленді. Клубтың бұрын қалыптасқан берешек бойынша қаржылық міндеттемелері толығымен орындалды», – делінген мәлімдемеде.
Бұған дейін жалақы мәселесіне байланысты «Жетісудың» негізгі құрамдағы бірқатар ойыншысы Қазақстан Премьер-лигасының 28-турында алматылық «Қайратқа» қарсы кездесуге шығудан бас тартуы мүмкін екені хабарланған.
Алайда клуб бұл ақпаратқа жауап беріп, команданың жаттығуды жалғастырып жатқанын және маусымның қалған барлық матчына қатысатынын растады.
«Жетісу» басшылығы клубтың қалыпты режимде жұмыс істеп жатқанын атап өтті. Сонымен қатар бұқаралық ақпарат құралдарын ресми мәліметтерге сүйенуге және клубтағы жағдайды шынайы көрсетпейтін ақпарат таратпауға шақырды.
Осылайша, «Жетісу» клубының мәлімдемесіне сәйкес, футболшылардың жалақысына қатысты мәселе шешілген және команда «Қайратпен» алдағы кездесуге қатысуға дайындалып жатыр.
- Соңғы
- Қазан, 09
-
-
-
-
-
-
-
-
-
-
-
-
-
-
-
-
-
-
Күнделікті жаңалықтар
10 қазан 2026
