Қазақстан бір айда 1,1 млрд доллар резервінен айырылды
2026 жылдың қазан айында Қазақстанның халықаралық резервтері 1,1 млрд долларға азайды. Қарашаның басындағы жағдай бойынша, Ұлттық қордың валюталық активтерін қосқандағы жалпы резерв көлемі 131,2 млрд долларды құрады. Төмендеудің негізгі себебі алтын қоры құнының арзандауы болды, деп жазады Kursiv.Media.
Қазақстан қаржыгерлері қауымдастығының деректеріне сәйкес, Ұлттық банктің жалпы халықаралық резервтері бір ай ішінде 2,4%-ға төмендеп, 64,3 млрд долларға дейін азайған.
Ең үлкен төмендеу алтынға тиесілі болды. Ұлттық банктің алтын портфелінің құны 6,4%-ға қысқарып, 48,1 млрд долларды құрады.
Алайда реттеушінің валюталық активтері, керісінше, 11,8%-ға өсіп, 16,1 млрд долларға жетті. Дегенмен бұл өсім алтын құнының төмендеуін толық өтеуге жеткіліксіз болды.
Сонымен қатар Ұлттық қордың активтері ұлғайды. Қазан айында оның көлемі 0,7%-ға өсіп, 66,9 млрд долларға жетті.
Сарапшылар теңге бағамының нығайғанын да атап өтті. Сейсенбідегі сауда-саттық қорытындысы бойынша доллар 1,6 теңгеге арзандап, 447,22 теңгені құрады. Сауда-саттық көлемі 416,5 млн долларға жетті.
Сарапшылардың бағалауынша, Ұлттық банктің доллар сатуы, экспорттық түсімдерді айырбастау және нарықтың басқа да қатысушыларының операциялары ұлттық валютаға қолдау көрсеткен болуы мүмкін.
Айта кетейік, Қазақстанның халықаралық резерві қыркүйекте 4,3 млрд долларға азайып, 133 млрд долларды құрады.
- Соңғы
Күнделікті жаңалықтар
12 қараша 2026
