Абу-Дабидегі үшжақты келіссөздердің бірінші күнінде не талқыланды

11.11.2026, 07:07 kz.kursiv.media

10 қарашада Абу-Дабиде Украина, АҚШ және Ресей өкілдерінің үшжақты келіссөздерінің алғашқы күні өтті. Жабық форматта ұйымдастырылған кездесу 4,5 сағатқа созылды. Тараптар соғыстан кейінгі қауіпсіздік кепілдіктерін, тұтқындарды босату және қақтығыстың қайта өршуіне жол бермеу тетіктерін талқылады, деп жазады Kursiv Media.

Келіссөздердің негізгі тақырыптарының бірі Украина мен Ресейдің қауіпсіздігіне қатысты өзара міндеттемелер болды. Ресей сыртқы істер министрі Сергей Лавровтың айтуынша, кездесудің күн тәртібіндегі бірінші мәселе Ресейдің, Украинаның және тұтас өңірдің қауіпсіздігіне қатысты болған.

Оның сөзінше, қазіргі келіссөздер барысында тараптар кейін қақтығысты толық реттеу аясында бекітілуі мүмкін негізгі қағидаттарды келісуі керек.

АҚШ мемлекеттік хатшысы Марко Рубио да Украинаға берілетін қауіпсіздік кепілдіктерін келіссөздердің басты тақырыптарының бірі ретінде атады.

Кездесу барысында гуманитарлық мәселелерге, соның ішінде әскери тұтқындарды босатуға да назар аударылды.

Украина делегациясындағы дереккөздің мәліметінше, тараптар Абу-Дабиде тұтқындарды ауқымды көлемде алмасу жөнінде келісімге келген. Алмасу жақын арада жүзеге асуы мүмкін.

Сонымен қатар тараптар шиеленісті бәсеңдету және соғыстың қайталануына жол бермеу жолдарын қарастырды. Украина президенті Владимир Зеленский үшжақты форматтағы кездесуді мазмұнды әрі сындарлы деп бағалады.

Келіссөздердің алғашқы күніне дейін Украина делегациясы АҚШ және Еуропа елдерінің өкілдерімен жеке консультациялар өткізген. Ал үшжақты кездесуден кейін АҚШ өкілдері Стив Уиткофф пен Джаред Кушнер Ресей және Украина тараптарымен одан әрі байланыс орнатуды жоспарлаған.

ТАСС мәліметінше, АҚШ тарапы қақтығыс сәтті реттелген жағдайда Украинаны қалпына келтіруге көмектесуге дайын екенін де білдірген.

Үшжақты келіссөздердің екінші кезеңі 11 қарашаға жоспарланған. Ресей делегациясын президент көмекшісі Владимир Мединский, Украина делегациясын ұлттық барлау қызметінің басшысы Рустем Умеров бастап барды. АҚШ атынан президенттің арнайы өкілі Стив Уиткофф пен Джаред Кушнер қатысты.

Толық оқыңыз…