«Елімай» футбол клубы жаңа бапкерін таныстырды
Семейдің «Елімай» футбол клубы 43 жастағы шотландиялық маман Питер Левеннің команданың бас бапкері болып тағайындалғанын ресми түрде жариялады.
Глазго қаласында дүниеге келген Питер Левен – шотландиялық «Рейнджерс» клубы академиясының түлегі. Футболшы ретінде Шотландияның «Килмарнок», Англияның «Милтон-Кинс Донс» клубтары мен Шотландия жастар құрамасының сапында 300-ден астам матч өткізген.
Кейінгі жылдары Левен Шотландияның «Абердин» клубының бапкерлер штабында жұмыс істеді. 2025 жылы командамен бірге Шотландия кубогын жеңіп алды. Сондай-ақ бірнеше рет бас бапкердің міндетін уақытша атқарған.
Шотландиялық маман Ресейдің «Орынбор» және Беларусьтің «Динамо-Брест» клубтарында да еңбек еткен.
Беларусь клубымен бірге 2019 жылы ел чемпионы атанып, 2018 жылы ел кубогын, ал 2019 және 2020 жылдары Суперкубокты жеңіп алған. 2022 жылы «Орынбордың» Ресей премьер-лигасына жолдама алуына үлес қосқан.
«Елімайда» Питер Левен 26 қазанда отставкаға кеткен Андрей Карповичтің орнын басты.
Қазақстан премьер-лигасының соңғы турында семейлік команданы бас бапкердің міндетін уақытша атқарған Серібек Қаппаров бастап шыққан болатын. Алайда «Елімай» өз алаңында «Оқжетпестен» 1:4 есебімен жеңіліп, маусымды алтыншы орында аяқтады.
Осылайша семейлік клуб келесі маусымда еурокубоктерге қатысу мүмкіндігінен айырылды.
- Соңғы
Күнделікті жаңалықтар
17 қараша 2026