Ауылға қарағанда қала халқы жыл басынан бері 5 есе өсті (инфографика)
2026 жылдың басынан бері қала мен ауыл халқының саны екі түрлі бағытта өзгерді. Қала тұрғындарының саны 151 мыңға көбейсе, ауыл халқы 32 мың адамға азайды. Kursiv.Media деректерді талдап көрді.
Жылдың басында Қазақстан халқының саны 20,5 млн болса, 1 қыркүйекте 20,62 млн-ға жетті. Сегіз айдағы жалпы өсім 118,9 мың адам болды. Оның 113,4 мыңы табиғи өсімге, 5,6 мыңы көші-қонға тиесілі.
Жыл басында Қазақстан қалаларында 13,09 млн адам тұрған. 1 қыркүйекке қарай бұл көрсеткіш 13,24 млн адамға жетті. Яғни қала халқы сегіз айда 150 931 адамға немесе 1,15%-ға өсті.
Қала халқының өсуіне табиғи өсім де, көші-қон да әсер еткен. Табиғи өсім 69,6 мың адамды құраса, көші-қон есебінен қалаларға тағы 81,3 мың адам қосылған.
Өсімнің басым бөлігі үш ірі қалаға тиесілі. Астана халқы жыл басынан бері 61,2 мың, Алматы қаласы 39,8 мың, Шымкент 22,8 мың адамға көбейді. Үш қаланың үлесіне Қазақстандағы қала халқы өсімінің шамамен 82%-ы тиеді.
Ауылдық жерлердегі жағдай керісінше. Жыл басында ауылдарда 7,41 млн адам тұрса, 1 қыркүйекте олардың саны 7,38 млн адамға дейін төмендеді. Сегіз айда ауыл халқы 31 957 адамға немесе 0,43%-ға азайды.
Бұл ретте ауылдарда табиғи өсім оң қалыпта: туғандар мен қайтыс болғандар арасындағы айырма +43,8 мың адам болды. Алайда көші-қон айырымы –75,8 мың адамға жеткен. Яғни табиғи өсім ауылдан кеткен халықтың орнын толтыра алмай отыр.
Ауыл халқы ең көп азайған өңірлер: Жамбыл облысы – 7,3 мың, Түркістан облысы – 6,5 мың, Қостанай облысы – 4,3 мың және Абай облысында– 4,3 мың . Ал Алматы облысының ауылдарында тұрғындар саны керісінше 14,9 мың адамға көбейген.
Kursiv.Media есебінше, жыл басында қала тұрғындарының ел халқындағы үлесі 63,8% болса, қыркүйекке қарай 64,2%-ға жетті. Ауыл халқының үлесі тиісінше 36,2%-дан 35,8%-ға төмендеді.
- Соңғы
Күнделікті жаңалықтар
2 қазан 2026
