Даулы заң мақұлданды: Франция бейбіт шерулерге қатысатындарға айыппұл салады
Франция парламентінің жоғарғы палатасы жаппай наразылық акцияларына қатысушыларға ұжымдық материалдық жауапкершілік жүктеуді көздейтін заң жобасын қабылдады, деп жазады Kursiv.Media.
Құжатты 229 сенатор қолдаса, 105 сенатор қарсы дауыс берді. Заң жобасының жаңа нұсқасына сәйкес, келтірілген кез келген залал үшін тікелей тәртіпсіздіктерге қатыспаған бейбіт шерушілер де жауапқа тартылуы мүмкін.
Ал құқық бұзушылардан 10 мың еуроға дейін айыппұл өндіріп алу көзделген.
BFMTV телеарнасының хабарлауынша, талқылау барысында сенаторлар заң жобасын одан әрі қатаңдатқан.
Енді құжат ұлттық ассамблеяның қарауына жіберіледі.
Бұл бастама солшыл күштердің өткір сынына ұшырады.
Франциядағы наразылық шерулері қыркүйектің ортасынан бері жалғасып келеді. Алғашында көшеге мектептердің жағдайын жақсартуды талап еткен жоғары сынып оқушылары шыққан.
Кейін оларға бағаның өсуіне наразы болған басқа өңірлердің тұрғындары қосылды.
Ең ауқымды акция 17 қазанда өтті. Ішкі істер министрлігінің мәліметінше, оған шамамен 550 мың адам қатысқан.
Құқық қорғау органдары шерушілерге қарсы көзден жас ағызатын газ, шу гранаталары мен су атқыш құралдарды қолданған.
- Соңғы
Күнделікті жаңалықтар
29 қазан 2026
